Vawiin chawhnu khan Mount Carmel School chuan 11th Mizoram Inter School Basketball Tournament 2019-a an champion lawmna hun Vanapa Hall ah an hmang a Pu Robert Romawia Royte, Minister of State for Sports & Youth Services Department chu khuallian niin Pu Lalthanzauva, Principal, Greenland Higher Secondary School chu khual zahawm a ni bawk.

Minister Pu Robert Romawia Royte chuan Mount Carmel School chu zirna lamah zirna In tha ber pawl anih rualin infiamna lamah pawh hma hruaitu ani leh thei chu fakawm a tih thu a sawi a, zirna leh taksa hriselna chu thil kal kawp tlat ngai a nih avangin hmasawn zel tur chuan heng thil pahnih te hi kan ngaih pawimawh a tul thu a sawi. Minister chuan mihring hmantlak ni tur chuan mi te tana mi tangkai leh malsawnna thlentu nih a pawimawh thu sawiin Mount Carmel school chu chutiang atana naupang zirtirna kawnga hmanraw tangkai tak anih mek thu leh ni chhunzawm zel turin duhsakna a hlan bawk a ni. Pu Robert Romawia Royte chuan sport discipline hrang hranga hma kan sawn theih nan Mizoram State Games buatsaih thuai anih tur thu a sawi a, Tourism department minister a nih angin mahni thlahtute khua ngaihhlut thiam leh tlawh chhuah uar thar turin naupangte chu a chah bawk a ni. Minister chuan khawvel changkanna ina a ken tel inbiakpawhna awlsam zawk te leh internet kaltlanga thil thehdarh zung zung te chu kan nitin nun leh hnathawhna te a tih awlsam viau rualin a hmang thiamlo tan chuan mahni leh midangte nun thleng tih chhiat theihna a nih avangin fimkhur taka hmang thin turin leh hman dan chin tawk hre theuh turin naupangte chu a chah bawk a ni.

Mount Carmel School 11th Mizoram Inter School Basketball Tournament 2019 lawmnaah hian Pu Lalnunkunga Sailo, Principal, Mount Carmel School chuan kalkhawm te lawmna thu sawiin Mount Carmel School Basketball champion team te chuan Mount Carmel school-ah a thlawn a an zir chhunzawm theih tur thu a puang a, zirlaite lehkha zirtir mai bakah zirlaite atanga an thiam thil haichhuah sak chu an thil tum pawimawh tak anih thu a sawi bawk a ni. He hunah hian basketball team players-te chawimawina hun leh champion T-shirt tlangzarhna hun neih a ni a, school naupang ten zai leh lam te an entir bawk a ni.