Vawiin khan National Health Mission chuan Taxation Department Auditorium, New Capital Complex-ah ni thum awh tur Review Meeting of Health Programmes an tan a. He hun hi Pu H. Lalengmawia, IAS, Secretary HFW chuan Khuallian niin a hmanpui a ni.

NHM Review Meeting hawngtu,  Pu H. Lalengmawia, Secretary H&FW chuan fuihna thu sawiin, "Central lam atanga Policy lo kalte, kan ram chhung ngeia kan policy neihte pawh a nihna ang taka kalpui a nih theih nan sawrkar hnathawkte hian nasa takin mawh kan phur a ni tih i hria ang u" a ti a.  "Hmasawnna tam tak kan neih lai karah tan lakna tur tam tak kan la nei tih a lang a. Heng kan hmabakte hlenchhuak a, India ram pumah pawh dinhmun sang ber kan luah theihna turin keini ho hian mahni inrin­tawkna sang tak kan neih a pawimawh a. Kan confidence level a san loh chuan kan tumna hi tih-hlawhtlinin a awm ngai lovang" tiin mahni inring tawk tak chunga mawhphurhna hlen chhuak zel turin kal khawmte a chah a ni.

Vawiin Review meeting-ah hian Inauguration and Orientation of Health & Wellness Centre leh Op-erationalization of Health & Wellness Centre chungchang zirho a ni a. Central lamin Universal Health Coverage atana Health & Wellness changtlung zawka kalpui a rawn tum tak avangin hemi kawngah hian nasa takin inpuahchahna kalpui mek a ni.

Vawiina Review Meeting tanna hun hi Dr. H. Lalchungnunga, Director of Health Services in a kaihruai a. Kalkhawmte lawmna thu a sawi zawh hnuah Dr.Eric Zomawia, Mission Director, NHM hnen atangin Keynote Address powerpoint presentation thlir leh ngaihthlak a ni a. Hemi hnu hian Dr.Lalnuntluangi, SNO, Health & Wellness hnen atang leh Pi Vanlalchhuangi, Jt.Secretary, HFW bakah Dr.F.Lallianhlira, Principal Director hnen atangin thawsawi ngaihthlak a ni a. Dr.T.Lalhmangaihi, Director, HME in vote of thanks sawiin Review meeting hawnna bik hi a khar a ni a. He hunah hian District tin Chief Medical Officer leh official pawimawhte an tel kim hle a ni.