Vawiin khan Champhai District Fire Prevention Committee chu an Chairman Bawrhsap Pu Alexander V.Chongthu hovin I&PR Conference Hall-ah an thukhawm a. He hunah hian Fire Prevention Week 2019 hman zawh taka hmachhawp siam bawhzui anih dan thlirlet a ni a, Kangmei ven kawnga District titha ber lawmman dawn hman dan tur leh kangmei hluar tak tak hmaa hmalak dan turte sawiho a ni.

Bawrhsap Pu Alexander V.Chongthu chuan  Champhai District in Mizorama kangmei ven kawnga District titha ber nihna  a hauh mek chu chhuanawm a tih thu a sawi a.  Hmahruaitu nihna chu vawngnunga   thawhhona tha zawk nen tun aia nasa zawka  hmalak zel a ngai a ni, a ti a.  Kangmei ven kawnga committee pawimawh tak telpuitute chungah lawmthu sawiin, Member-te leh District mipuite chu lungrual taka thawhhopuiah a sawm nghal a ni.

He hunah hian Pu Lalduhthlana, DFO & Member Secretary, District Fire Prevention Committee hnen atangin kangmei ven hapta 2019 hman zawh taka hmalakna neih hrang hrangte leh District dinhmun tlangpui ngaihthlak a ni a. Kangmei ven hapta chhungin  Public Consultation Meeting,  mipuite zirtirna Public Awareness Campaign hmun hrang hrangah tum 16 neih ani leh Champhai khawpui chhung leh RO Headquarters tinahte Fire Prevention Rally huaihawt anih thute tarlan a ni a. Zirtirna hrang hrang Chanchinbu leh Cable TV kaltlanga neih bakah khawtinah Village Level Fire Prevention Committee, Fire Fighting Squad din tura  tih  leh YMA Information  Centre hmanga a tam thei ang ber mipuite zirtirna pe tura hriattirna chhuah anih thu ngaihthlak a ni a. Member Secretary chuan District chhunga  VC tinte hnenah mei kawng sial tha tur leh kangmei ven kawnga khawtlang anga hmala tura hriattirna pek a ni tiin,  khawtin ten Lo hal hun ruat ang thlapah an hal vek a ni, a ti a. Kangmei veng tha khua leh Chanchinbu thawhhlawkte lawmman pek an nih thu pawh sawiin, kangmei ven kawnga Champhai District hmasawn chakzia thlirin a lungawi thlak a, a phena thawktu zawng zawngte an fakawm hle a ni, a ti bawk.

Meeting-ah hian Champhai District-in kangmei ven kawnga District titha ber lawmman  Rs 50000/- hman dan tur rel a ni a, Committee chuan heng sumte hi District Park, Hringlangtlang  venhimna atan hman tha tih a ni a,   mei kawng tha tak sial leh tuaihnum hna kalpui nise, a tul anga lo bawhzui turin Forest Department, Sub-Hqtrs YMA leh Mualkawi YMA te ruat nghal a ni. Heng bakah hian kangmei hluar hun thlen tak tak hmaa hma lo lak dan turte chipchiar takin  sawiho a ni a. DLAO kaltlanga VC tinte hnenah sawrkar dan dinglai tlawhchhana sawrkar enkawl kawng  kam tawn tawn feet 100 thleng vat chhuak lo tura hriattirna siam leh district thuneitu hnenah thupek khauh tak  siam tura ngen nise tih a ni a. Mahni huan lo ram venghima meilam sial tha theuh tura mipuite hriattir leh State Level Committee-in kangmei ven hapta neih leh tura thupui a thlan tur zulzuia mipuite zirtirna zau tak  Video Clip siama thehdarh nise tih a ni a. Ram mai bakah In leh a vel kangmei laka fimkhur angaih ziate, tullo leh kuthlei thiltih vanga kangmei chhuak thinahte thil tisualtu chu manchhuaka  dan ang thlapa hremna pek zel nise tih leh  Zirna In hrang hrangahte kangmei ven pawimawhna leh kangmei tichhuak lo tura intiamkamna te neihpui thin nise ti a rel a ni bawk.

Satellite Mapping Data leh Forest Department Spot Verification-in a tarlan dan chuan   kumin 2019 tun hun thleng hian ram kang tum 111  awm tawhin heng vang hian  ram Hectare 2883.35 a zau a kang ral anga chhut a ni a. Ram kang tam ber hi Lo hal  niin, tum 96  halah ram  Hectare 2803.55 a kanga, Vau kangkai  tum 6 awmin, ram Hectare 8.70 a zau a kang a, Ram palaileng kang tum 7 chhinchhiah vangin ram Hectare 21.10 a zau kanga chhut niin, Forest ram kang tum 2 awmah ram Hectare 50 a zau a kang bawk a ni.