Vawiin khan Pawlrang Village Council buatsaihin Pawlrang Bazar ah LAD in Pawlrang khua bawlhhlawh awmze nei zawk a sawngbawl kawnga hmalakna (Solid Waste Management), a bultanna tur, model village a a puan denchhenin hun hman a ni a, Pu K. Lalrinliana, Minister of State, LAD, FCS&CA leh Fisheries Department, chuan khuallian niin  he hun hi a hmanpui a. Pu L. Thangmawia, bialtu MLA, Human Resources  Development Board Vice Chairman ni bawk chu khualzahawm a ni.

Pawlrang mipui kalkhawm hma a thusawitu khuallian Pu K. Lalrinliana chuan Pawlrang khua chu bawlhhlawh tawih thei leh tawih theilo thliar hran kawngah leh faina kawnga an hmalakna ropui a tih thu a sawi a. Khawtlang mipuite inlungrualna leh tanrualna a that vang a ni tih a hriat a, a zahawm hle bawk a ni a ti. Minister chuan ram changkang zelah faina hian ngaihpawimawh a hlawh a, sawkar laipui pawhin tan a la nasa hle a hei hian rah tha a chhuah mek zel a ni a ti a. Mizote pawh tunhma a hnam bal ber pawla sawi kan ni thin a, tunah erawh faina kawngah hma kan sawn in India ramah pawh hnam fai pawl a chhal ngam kan ni tawh a. Kristianna hian faina a ken tel ve bawk avangin kan inhmeh hle a ni a ti. Mihring hi kan fai chuan kan nun a hlim a, hmel a faiin inrintawkna kan nei thin a ni a ti a, Pawlrang khua chu hemi kawngah khaw entawntlak an ni a ti.

Minister chuan ei leh bara kan la intodelh hleithei lo hi a veiawm a, keimahni thar ngei buhfai lei tumin sawrkarin ruahmanna a siam a, hetih lai hian kan buhfai thar ration atana sem tham tharchhuah kan la nei theilo hi kan Chief Minister leh Agriculture Minister te pawhin an vei em em a. An thahnemngaihna avangin Agriculture department pawhin buh thar tam turin nasa takin tan an la a, hei hian rah tha a chhuah ngei a beiseiawm a ni a ti. Buhfai bakah sa leh thlai ah pawh kan la intodelh lo nasa a, ramchhunga kan tharchhuah aiin ram pawn atanga kan lakluh hi a tam zawk hle a, ram pawn atanga kan lakluh a la ngaih reng avangin ramchhunga pawisa leng vel tur pawh rampawnah a luang chhuak reng a, hei hi hma kan sawnna daltu lian ber pakhat a ni a ti a. Intodelh turin theihtawp kan chhuah a ngai a, kan ram leh hnam zahawmna atan a pawimawh em em a ni a ti a. Hei hi naupangte atang kan inzirtir a tul a, kan pi leh pu te khan kuthnathawh an zahpui ngai lova, keini an thlah te hian kan chhawm nun zel a ngai a ni a ti. Minister hian Pawlrang VC te hnenah hian khawtlang thilpawimawh a an hman atan Rs. 10,000/- a hlan a ni.

Khualzahawm bialtu MLA ni bawk Pu L. Thangmawia pawhin thusawiin Minister dawhthei leh taima kan nei hi kan vannei hle a, ei leh bara kan intodelhna atana hmathlir thui tak a neih hi a hlawhtlin theih nan mipuite leh sawrkar hnathawk ten kan tawiawm that a ngai a ni a ti. Bialtu MLA hian Pawlrang YMA hnenah no dozen 10, thingpui tray pahnih leh Ketli a hlan a, MUP hnenah Dekchi lian a hlan bawk a ni.

Pawlrang khua hian kum 2016 December thla atangin bawlhhlawh tawih thei leh tawih theilo an thliar hrang tan a, kum 2017 khan Champhai District a Village Council hna thawk tha ber pahnihna lawmman an la a. Kum 2018 khan Champhai District a ram kang ven kawnga hna thawk tha ber lawmman an dawng a. Kum 2019-ah Swachh Bharat Mission hnuaiah Champhai District a hma la tha ber lawmman an dawng a, bialtu MLA Pu L. Thangmawia'n "Model Village" atan a thlang bawk a ni.

Inkhawm kaihruaitu Pu Biakthansanga, VCP, Pawlrang chuan VC House sakna tur a pek vangin Minister hnenah hian lawmthu a sawi a, Minister hmalakna avanga ration chini an lak theih tak avangin lawmthu a sawi bakah Plastic bawlhhlawh khawl hran kawngah Mizoramah a hmahruaitu nih an tum thu a sawi bawk a ni.

Supply Minister hian kum 1998 a sak buhfai quintal 1500 dahkhawl theihna Hliappui supply kudam leh staff quarters te a tlawh nghal bawk a, Kudam dinhmun enfiahin hmalak ngai lai te a a hmunah a en a ni.

Minister hi Pu R.S. Lalzamliana, Director, LAD, Pu C. Zasanga, Addl. Director, FCS&CA leh official pawimawh ten an tawiawm a ni .