No.3166/2021-2022
Aizawl, the 26th November 2021 : Union Home Minister in a ruahman angin nimin (25.11.2021) tlai khan Assam House, Chanakyapuri, New Delhi ah Chief Minister Pu Zoramthanga chu Assam Chief Minister Pu Himanta Biswa Sarma nen thu pawimawh hrang hrang sawiin zanriah an kil dun.

Chief Minister pahnihte chuan state pahnih tana hmasawnna tur thil kaihhnawih hrang hrang an sawiho a. Pu Zoramthanga chuan thil dang tam tak karah Hachhek tlangdunga kuhva hring thar chhuah, a hralhna lama Patharkandi District-a bial thuneitu thenkhatin Myanmar atanga lo lut ni a an ngaih avanga an lo hnar sak thin thu a sawi a. Kuhva chinga eizawng Mizo tam tak tan harsatna sutkian sak nan an kuhva hring thar an lo hnar sak thin chu ti tawp thuai turin Assam CM chu a sawipui bawk.

Assam CM hi Assam Agriculture and Veterinary Minister Pu Atul Bora chuan tawiawmin, Chief Minister Pu Zoramthanga hi Pu Rosangzuala, OSD to CM, Delhi Mizoram House Resident Commissioner Pu Amjad Tak leh official dangte'n an tawiawm.

Vawiin tlai hian Union Home Minister Pu Amit Shah hova thukhawm leh tum a ni.