No.3167/2021-2022

Aizawl, 26th November, 2021 : Commerce & Industries Minister Dr R. Lalthangliana chuan vawiin chhun khan  Zuangtui Industrial Estate-ah Bamboo Processing Factory leh Common Services Centre a hawng. Bamboo Processing Factory hi Agarbati kuang (Agarbati stick) siamna tur niin Common Facility Centre hi Zuangtui Industrial estate-a Handloom Weavers te’n an hmang ang.

Commerce & Industries Minister Dr R. Lalthangliana chuan Mizoram-in kan ram economy chawi kang tura kan intodelh ber pakhat chu mau hi a ni a, sorkar pawhin kan ngai pawimawh hle a ni, a ti a. Hetiang a kan ram mau ngei hmanga, eizawnna ngelnghet thalai te tana din a ni theih hi lawmawm a tih thu sawiin, kan ramah mau a tha duh a, mau phurhchhuahna tur link road tha kan neih a pawimawh vagin Chief Minister Pu Zoramthanga’n a vei em em a, sawrkar laipui lamah a bawhzui mek a ni, a ti.

Dr R. Lalthangliana chuan Mizoram sawrkarin Industrial Growth Centre, Sakawrtuichhuna a din chu a nihna tur ang taka kan hman tangkai theih nan uluk takin ruahmnanna felfai tak siam a ngai a ni  a ti a. A tak ram chan tir thei lo leh a nihna ang taka kalpui thei lo hmunhma nei ann tam tih sawiin, a ramri chijn pawh pawn lam atanga nasa taka nek a ni tih a sawi a, sawrkar laipui leh State pawn atang pawh aen tlak leh tlawh tlak ni tura hmun hrang hranga kan hmunhmate hi cheibawl a tul a, hemi atan hian master plan felfai leh mumal tak kan siam a tul a ni a ti a. project kan siam dawnin a rotling tur bakah mipuiten a hlawkna an tel ngei theih turin engkim ngaihtuah fel vek thin a pawimawh a, hluihlawn mai mai tur leh mipui leh sawrkar tana phurrit ni tur project hi chu ngaihtuah loh a tul tih a sawi bawk.

Bamboo Processing Factory hi Bamboo Development Agency -in National Bamboo Mission hnuaiah cheng nuai 60 seng-a a din niin, kum 2020 September thla a sak tan a ni. Round Agarbatti Stick, size hrang hrang siamchhuahna hmun tur a ni a, thla khatah round agarbatti stick 10.40 tonnes siamchhuak thei tura duan niin, heng stick siamchhuah zawng zawng te hi khawvela Agarbatti siamtu Company lian ber Ranga Rao & Son, Mysore te'n man man takin an lei vek zel dawn a ni. Ranga Rao & Son Company mi leh sa te pawhin a hmunah rawn kalchilhin, he unit atanga product awm te an endik vek hnu ah, he unit atanga product awm zawng zawng te tha tawkah ngaiin, lei vek an duh thu an sawi a, anni hian India ram bakah, Las, Vietnam leh USA ah factory an nei a ni.

He unit ah hian agarbatti siamna khawl 8 dah a ni a,Round agarbatti siamna atanga hnawmhnawk (waste) tlingkhawm te hmang tangkai turin, bamboo charcoal & vinegar unit siam tel a ni a, he unit hi Zero Waste nitura duan a ni a, round agarbatti stick siam chhuah te nget-in a eichhiat loh nan, seasoning chamber pakhat siam a ni bawk.

Minister hian Bamboo Processing Factory a hawn zawh veleh hian Common Facility Centre, Bamboo Development Agency in a din chu a hawng nghal bawk a ni. He Common Facility Centre hi. Zuangtui Industrial Estate-a Handloom Weavers te'n an hman tangkai tur a din a niin, Handloom Textile & Handicraft Wing, Directorate of Commerce & Industries Department-in a enkawl chhunzawm ang.

 Puantahtute hian puan ban manah Rs. 1200 te an chawi thin a bakah la hlum man te pawh an chawi thin a, an mamawh phuhruk nan Comerce & Industries departmentchuan Common Facility Centre-ah hian electric hmang la hlumna leh a phei hlumna a hnuaia tarlante hi a mamawh apiangin a tlawm thei ang bera an hman turin a dah a

1.        La duang atanga bobbin a hlumna 4

2.      La duang atanga pirn a hlumna 4

3.       Puan ban khawl 4

Heng khawl hi enkawl turin demonstrator ten an thutchilh dawn a , a hman man pawh a tlem thei ang ber bituk turin ruahmanna siam mek a ni.

Vawiin hun hi Aizawl mayor Pu Lalrinenga Sailo, Pi Florence Zotluangpuii, Executive Director, Bamboo Development Agency & Director, Commerce & Industries Department leh Commerce & Industries official te leh Bamboo Development Official te'n an hmanpui a ni.

Zuangtui Bamboo Processing Factory hawnna inkhawm hi Pu Lalduhpuia Sailo, Dy. General Manager chuan kaihhruaiin, Pu Zosangliana Ralte, Asst. Engineer-in Technical Report a pe a, Pu Lalzarliana Hrahsel, General Manager chuan lawmthu sawina hun hmangin hnu a khar a ni.


Attachment

  • Loading attachment...