No.3168/2021-2022
Aizawl, 26th November, 2021 : Dr Pachuau Lalmalsawma, Official Spokesperson & State Nodal Officer, COVID-19 chuan tun hnaiah Mizoram hmun hrang hrangah Hostel leh Home bakah punkhawmnaah COVID-19 inkaidarhna a nasat thu a sawi.
Dr Pachuau Lalmalsawma chuan Covid virus kai si a in test mai loh hian nghawng chhe tak a nei thei tih sawiin, nunna hlu tak kan chan zel lohna turin COVID-19 Symptom neite ngaihven leh ngaihsak hi kan mawhphurhna-ah kan ngaih leh hle a tul a ni, a ti a. Kan chhungte leh hnaivaiten COVID-19 Symptom an neih chuan a rang thei ang berin LLTF/VLTF hriattirin Aizawl khawpui hmun hrang hranga man chawia in test theihna hmun – KIOSKS ah rang takin in test tur a ni. Tunah chuan mahni in vil chungin Home Isolation a tih theih tawh bawk avangin mahni in ring tawk taka in test hma hi nunna atan pawh a pawimawh hle ni a ti.
Aizawl khawpui chhungah Mega Kiosk pakhat Vanapa Hall, Tuikual South-ah a awm tih sawiin, Kiosk hi veng hrang hrang 13 - Bawngkawn South, Chawlhhmun, Dinthar, Durtlang, Zemabawk North, ITI Veng, Kulikawn, Zotlang, Chaltlang, Ramthar, Armed Veng South, Mision Vengthlang leh Sihphirah te siam anih thu a sawi a. Mini-Kiosk pawh veng 6 – Hunthar, Electric veng, Bethlehem Vengthlang, Muthi, Selesih leh Durtlang Leitan-ah dah a nih thu a sawi bawk a ni.
COVID-19 Symptoms tlanglawn zual lanchhuah dan hrang hrantgte tarlang nawnin heng – khawsik, khuh ro, hrawk za leh hrawk na, lu na, taksa na leh kha them thum, taksa chak lohna leh luhaina, chaw leh thil ei tui lohna, thil rim hriatna hloh, luak chhuak leh luak, pum nuam lo leh kaw thalo, thawhah leh boruak kham khawp lohna neite kan awm chuan a rang thei ang bera in test ngei ngei turin mipuite a chah a ni.
Dr Pachuau Lalmalsawma chuan COVID -19 do hna hi mipui tan leh mipui Programme, tanrualna nen chauhva hneh theih a nih avangin hmai tuam, kut tihfai leh a theih chin chinah mi dang nena in chiahpiah lo turin mipuite ka ngen nawn leh a ni, a ti a. Covid-19 Vaccine a bikima la la lo ten a hma lama la turin a chah thar leh a ni.
