No.3169/2021-2022
Aizawl, 26th November, 2021 : Azadi Ka Amrit Mahotsav Iconic Week pualin Food Corporation of India(FCI), Divisional Office Aizawl chuan vawiin khan Hotel Regency-ah programme a buatsaih a. Pu K.Lalrinliana Minister of State, Food Civil Supplies & Consumer Affairs chuan he programme hi Khuallian niin a hmanpui a ni.

Minister chuan India ramin tun dinhmun thleng tur hian Sawrkar laipuiin mipui tan hma a la nasa hle tih a sawi a. FCI pawhin sawrkar programme leh scheme tam tak tha takin a kalpui a ni, a ti a. Chung zingah chuan NFSA programme a kalpui dan te, mipui harsa zual pawhin eitur tlachham lova a hun taka buhfai a pe chhuak thin te, thla 3 chhung stock a nei thei rengte chu lawmawm a tih thu a sawi a.Welfare Institution Scheme a kalpui chu fahrah leh mirethei tam tak leh zirlai harsa ten an chhawrin school naupang te chawchhun dawn pawh FCI kaltlang a supply a nih thu a tarlang a. State sawrkarin non-NFSA tan ration sem tur a leisak thin pawh eng emaw chen aman tlawm zawkin Open Market Scheme(OMSS) in a ruahman sak tih sawiin Pu Rinliana chuan Covid hripui len hnuah a hma aia zing leh tamzawk lei thei tura ruahmanna FCI in a siam chu lawmawm a tih thu a sawi a. India ram pumah hemi atan FCI in buhfai 8.04 flakh MT a pe chhuak tawh a. Non-NFSA ten thla tin 50,000 qtls kanlei ziah theihna tur ruahmanna te a siam theih chuan a lawmawm hle ang, a ti a. Hei bakah hian chhim lama FCI Go-down Lawngtlai leh Lunglei atangin OMSS te h pek chhuah ve theih ni se a duhawm hle tih a sawi. Minister chuan FCI in Sairanga FSD Godown 10,000 MT dahna tur a sa tan tawh chu lawmawm a tih thu a sawi a. Khawzawlah Mizoram sawrkarin hmun a pek fel tawh tih sawiin document peihfel veleh FCI lamin kut an thlak thuai a beisei tih a sawi a. India ramin kum 75 zalenna a lawm mek laiin FCI in kawng hrang hranga mipui tana hna a thawh dan chu entawk tlak leh chhuanawm a tih thu a sawi a ni.

Iconic Week puala programme buatsaih hi Pi Zodinpuii Ralte, Divisional Manger, FCI, D.O Aizawl-in a kaihruai a. FCI in sawrkar programme leh scheme hrang hrang a kalpui mekah Covid hrileng avangin NFSA beneficiary te tan sawrkar laipui ruahmanna hnuaiah PMGKAY kaltlangin nikum chhungin thla 8 leh kuminah thla 7 chhung a thlawnin mi pakhat zel tan KG 5 thla tin buhfai sem tur a hun takah an pe chhuak thei a. PMGKAY hnuaiah 26320MT buhfai pek chhuah a ni a. India ram pumah PMGKAY hnuaiah hian 360.11 lakh MT buhfai pek chhuah niin March 2022 thleng thla 4 dang pek leh turin Central sawrkarin thu a chhuah tawh bawk a ni. Hemi bakah hian Covid hri len hluar laia migrant worker te tana Atma Nirbhar Bharat Scheme hnuaiah a thlawnin mi pakhat tan thla hnih chhung buhfai Kg 5 zel, a vaiin 5.56 lakh MT a pe chhuak bawk a. NGO leh charitable organisation ten community kitchen leh relief camp an siam nen buhfai 847 MT lai FCI hian a pe chhuak a ni.