2005/2022-2023
21.09.2022: Mizoram leh Assam Chief Minister te Pu Zoramthanga leh Pu Himanta Biswa Sarma te chu Assam House, 1 Bordoloi Marg, New Delhi ah state pahnih inlaichinna chungchangah an inkawm.

CM te pahnih inkawmna ah hian ramri chungchang thu an sawidun a. Hemi chungchangah hian a tira state pahnih Minister te leh official ten inbiakna te nei se, a tul angin Chief Minister te ve ve pawh inbia se tih chu bawhzuia vawiina inkawm hi an ni a. Minister leh official te'n bul tana inbiakna an neih chu tluang takin kal zel nia an hriat dun thu an sawi a. Ramri chunchungchang inbiakna awm chu lawmawm a tih thu an sawi a ni.

Kuhva chungchang thu sawi bawkin, kuhva ro dan lo anga lo lut chu Assam leh Mizoram chuan lo dan vek a, amaherawhchu kuhva hring, Mizorama chin erawh engti kawng maha dang lovin, a hralhna tur hmunah tlang zel ni se tia sawi a ni a. Pu Himanta Biswa Sarma pawhin theihtawpin a tul chuan police te hmangin kuhva hring chu dang lova tlang tir zel a tum thu Pu Zoramthanga chu a hrilh a ni.

Heng bakah hian thu pawimawh tak tak dang an sawidun bawk a ni.