2006/2022-2023
Aizawl, the 21st September 2022 : Vawiin khan Cooperation Minister Pu C. Lalrinsanga chuan MIZOFED Supply Chain Main Hub(Godown) chu Zuangtui, Aizawl ah a hawng.

Minister Pu C.Lalrinsanga chuan Federation hrang hrang hruaitute leh MIZOFED chhungkua zawng zawngte chungah lawmthu a sawi a. Vawiin kan kal khawm chhan building hi a Main Hub a nihna angin, kan beisei ai pawha lian kan nei thei hi lawmawm a ti a, Main Hub bakah District 11 ah kut hnathawk tute thar chhuah leh thildang Production Collection Centre sak leh ruahmanna te a kal mek bawk a ni a ti a. He Supply Chain Main Hub in a tinzawn ber chu Consumer Commodity mai bakah kut hnathawk tute thawhchhuah, thlai leh thildangte sum a chantirna hmun leh mipui (consumer) ten zangkhai zawk leh man man zawka an mamawhte an lei theihna hmun tur a ni a ti a. Mizoram khaw tam takah Farmers' Society hrang hrang awmin, society te hnathawh lo pui turin Federation hi a khaikhawmtu a ni a ti a. Federation hrang hrangten an hma teuhah hmalakna tur leh hmasawnna tur an neihah tan la a, hmasawn tum zel turin a chah bawk a ni. MIZOFED chuan tun dinhmunah bungrua wholesale lamah tan la tharin, Aizawl District leh a chhehvela mipui mamawh bungruate hralh a chak theih nan hma la tharin, Packaging Unit leh Mobile Sales Unit te an indin thar a ni a ti a. MIZOFED Supply Chain Hub nghaktu leh thawktute pawh dawr nuam leh mipui rawngbawl an ni tih inhre reng turin a chah bawk a ni.

Mizoram a Supply Chain Main Hub lian ber hi NEC atanga sak a ni a. Post Harvest Project atan cheng nuai 461 hmuh a ni a, chuta tang chuan cheng nuai 178 sengin Supply Chain Main Hun building hi sak a ni. A hmun hi a tirah chuan godown te reuh te a ni a, a hmun rawt hniam hmasak a ni a, Building floor hnih hi kawng an ve ve niin, load leh unload na hmun remchang tak a ni. Hna hi September, 2021 ah tanin, tunkum January, 2022 ah cement work tan a ni a, July 2022 ah sak zawh fel a ni. Tun dinhmuna bungrua awm te chu Amul, Cooker, Arham, Padma, Basmati, Mr. White, Chini, Dal niin, a vai hian cheng nuai 115 man a awm (stock) mek a ni. Vawiin khan bungrua chhuak hmasa ber chu Lunglei ah thawn a ni nghe nghe a ni.

He hun hi MIZOFED Chairman Pu K. Rothangpuia chuan kaihruaiin, MIZOFED Managing Director Pu Rinzuala hnen atangin Technical Report ngaihthlak a ni a, Board Of Directors, MIZOFED Pu Lalzahawma Khiangte in lawmthu sawiin he hun hi a khar a ni.