Zan khat chama Aizawl rawn tlawh mek Assam Home, Political & Border Areas Development Secretary Pu G.D.Tripathy, IAS chuan vawiin khan Mizoram Home Secretary Pu K.Riacho, IAS chu a pisaah a kawm a. Home Secretary pahnih te hian Assam leh Mizoram inkara thawhhona tha leh boruak muanawm a awm zel theih nan theihtawp chhuaha an thlawp thu leh state 2 te kaihhnawih eng thil pawh nise sorkar pahnihte chu inrawn tawna, thutlukna siam a nih hnuah chauh hmalak thin nise tih an duh thu an sawidun a ni.

Home Secretary pahnih inkawmnaah hian tun hnaia Mizoram atanga Lailapur hmuna brick leh insakna bungrua dang lei tura kalte chu Cachar-a miten checkgate siamin bungrua an lei hmain pawisa chawitir thin an nih bakah an brick lei tur te pawh a hmunah en emaw thlan an phal lova, an duh duh an lei tir thina hriat chu Assam Home Secretary Pu Tripathy chuan lo enfiah a, tihtawp tir nghal a nih tur thu Pu Riacho a hrilh nghal a ni.

Assam Home Secretary Pu G.D. Tripathy hi naktuk tlai dar 3:00-ah Assam lam panin a haw dawn a ni.