Vawiin khan Mizoram College of Nursing chuan 25th Graduation and Lamp Lighting Ceremony, Chaltlang Tourist Lodge-ah an hmanga, Mizoram University Vice Chancellor Prof. Lalthantluanga’n a hmanpui.

Prof Lalthantluanga chuan damlo enkawl kawnga Nurse te mawhphurhna hi hmangaihna leh lainatna thinlung nen chauhva thawh chi, mahni inpekna nen an enkawl damlo te duat taka chhawmdawl thin tu tur an ni, a ti a. An inpekna hian damdawia enkawl an nih hma pawhin namen lovin damlo te tan damna a thlen thei a ni, a ti. Damdawia inenkawlna medical service hi thil thanglai mek, tunlai thiamna leh finna ang zela hmalam pan a nih avangin vawiina Nurse chhuak te pawh hian chutiang hmasawnna te chu an man phak ve zel a pawimawh a ni, a ti a. Nurse mawhphurhna kawnga an theihnghilh hauh loh tur pakhat chu fimkhurna hi a ni tiin hei hian damlo te thihna leh damna a hril thui thei hle MZU Vice Chancellor chuan a ti bawk. Prof.Lalthantluanga hian MCON website thar www.mizoramcon.org a hawng nghal bawk a ni.

Tun tuma zirlai hlawhtling 29 te hian an kal zelna turah thutiam an lak entirnan sathau khawnvar an hal a, intiamna thu an chham rual bawk.

Vawiin inkhawmah hian Zoremsangi Academic Excellence Award, tangkafai cheng 6000 keng tel chu Mizoram University hnuaia Bsc Nursing exam a pakhatna T.Lalrinawmi, Bungzung hnenah Health Department Jt. Director (Nursing) Pi Lalbiaksangi’n a hlan a, pahnihna Lalhmingliani, Vairengte hnenah Health and Medical Education Director Dr Lalrinliana Sailo chuan Biaksangi Academic Excellence Award, cheng 5000 keng tel a hlan thung. Mizoram College of Nursing Principal Pi Lalchhanhimi’n report tlangpui sawiin he College din tan atanga vawiin thlenga a kal dan tlangpui te, Nurse zirtir kawnga an hmalak leh hmachhawp hrang hrang te bakah zirlai te hlawhtlin tawh dan tlangpui a sawi a, kumin hi an tihthat ber tum niin a titha zual thlan chhuah sawm zingah an College zirlai pariat an tel a ni, a ti.