NLUP atana e-banking ruahmanna chu Chief Minister Pu Lal Thanhawla, Apex Board Chairman hova lo rel tawh angin vawiin khan NLUP Implementing Board (NIB)conference hall-ah chipchiar zawka thlir ho a ni a. NIB Vice Chairman Pu P.L.Thanga hovin line department zawng zawng te, Planning leh Finance department te bakah State Bank of India hotute an tel a ni.

E-banking ruahmanna ang chuan line department zawng zawng ten SBI ah account an hawng ang a. NIB chu Customer Information File(CIF)neitu niin line department zawng zawng-a sum lut leh chhuak leh an sum dinhmun tharlam ber thlengin eng hunah pawh a enpui thei dawn a. Department te sum indaihlohna pawh a hriatpui zung zung theih dawn avangin an harsatna pawh chak zawkin a sutkian pui thei dawn a ni.

NLUP atana sum hmanna zawng zawng lang tlang taka kalpui a nih theih nan te, chak zawka sum lut leh chhuak a kal theih nan te, felfai taka line department te sum hmanna vawn a nih theihna tur te in e-banking hi hman thuai tum a ni a. Hemi chungchang ah line department te leh SBI inkara thawh ho dan tur ah te, SBI leh beneficiary te account hawnna bank inkara sum inhlan chhawn dan tur ah te ruahmanna fel tak siam a nih dan pawh vawiin a meeting ah hian SBI hotute chuan an sawifiah a. E-banking hman thuai a nih theih nan SBI Mizoram chu line department leh an district office zawng zawng a NLUP mawhphurtute leh district tina D.C aiawh, mawhphurtute chu November 6& 7 hian e-banking atan training neihpui tura tih a ni.