Vawiin chawhnu dar khat khan Pu AK Pathak, Under Secretary, Election Commission of India, North Eastern Region bialtu chuan Electoral Roll Summary Revision chungchanga election office hnathawh dan leh hmalakna te a hmunah a enfiah a, District Bawrhsap Pu Lalsangliana, SP leh Constituency pathuma AERO te bakah Serchhip District MJA hruaituten an lo dawngsawng a ni.

Pu Pathak-a chuan Election official-te an awmna hmun tura an awm leh awm loh te leh an harsatna tawh tlangpui te a rawn en a. DC Pu Lalsangliana chuan bial tina Designated Officer-te leh Booth Level Officer-te chu anmahni bial mi theuh rawih nghal deuh zel an nih avangin mipuiten an dawr duh hunah pawh harsatna awm lova hmuh nghal theih zel an nih avangin Mizoramah chuan Roll Revision leh endik chungchangah harsatna a awm meuh loh thu sawiin chanchinbu mite hnathawh avang leh Public Information system tha tak kan neih bawk avangin hna thawh a awlsam phah thin hle a ni a ti a, National Voter’s Day hman thin a ni chuan vote nei tharte zingah Electoral Roll-a awm a thatna leh pawimawhna a hriattir thin avangin mipuiten ngaihven nachang an hriat phah a, Roll-a inthun thar chungchangah pawh hna thawh a tih awlsam hle a ni a ti bawk.

Pu Pathak-a hian mipuite harsatna tawh thin tlangpuite leh a sutkian dan te sawipuiin, Serchhip-a Election Office hna thawh dan te, anmahni dawrtu mipuite mamawh an phuruk dante leh an thil pawimawh vawn dan te pawh a en nghal a, tha a tiin lungawithlak a ti hle a ni.

Pu Pathak-a hi Pu R. Vanlalsawta Assistant Chief Electoral Officer, Directorate of Election, Government of Mizoram chuan a tawiawm a ni.