No.6225/2020-2021 

18.10.2020: Chief Minister Pu Zoramthanga hovin vawiin khan ramri chungchanga thu pawimawh ngaihtuahin Council of Ministers chu CM Conference Hall-ah an thukhawm a. A hnuai ami ang hian thuchhuah an siam:

"(1) Vawiin ni 18.10.2020-a Cabinet Meeting chuan Mizoram chhung hmun thum lai - Thinghlun, Saihapui ‘V’ leh Vairengtea Assam Sawrkar hnuaia district administration lamin buaina an rawn siam hi pawi a ti hle a, Assam Sawrkar hian boruak muanawm a siam vat a beisei a ni. 

(2) Ramri a Mizoram mi chengte thlabar thlamuan tur leh Mizoram chhung leh ramri venhimna atan police dah belh nghal nise tih a ni. 

(3) Mizoram luhka kawngpui Assam ram chhungah dan a nih avangin Mizoram mipuite mamawh ei leh bar leh nitin chakkhai thil dangte a rawn lut thei ta rih lova, thenawm State dangte atanga kan mamawh, a bik takin cooking gas (LPG) leh POL la lut tura hma lak mek a ni. Mipuite’n harsatna kan tawk anih pawhin ram leh hnam thil a ni tih hriaa lo tuar hram hram turin Mizoram Sawrkarin a ngen a, tumahin mamawh bak chheprel lova ‘Sem sem dam dam’ rilru pu chunga kan hun tawn mek te pheikhai rual taka kan hmachhawn tlan theihna’n kan inngen nawn leh a ni. 

(4) Ramri hrula buaina chinfel anih theihna’n Mizoram leh Assam Sawrkar chu an indawr reng a, Ministry of Home Affairs ah pawh dik lo taka Assam Sawrkarin hma an lak dan hi report ani tawh bawk a ni. MHA pawhin Mizoram Sawrkar thu thlente ngaipawimawhin naktuk ni 19.10.2020, dar 11:30 AM hian Union Home Secretary-in Mizoram leh Assam Chief Secretary te video conference a neihpui dawn a ni. 

(5) Harsatna kan tawn mek hi tumahin mimal emaw pawl anga advantage lak tumlo turin leh Sawrkar hmalakna ti thuanawp zawnga hma la lo turin kan inngen bawk a ni."

Vawiin Council of Ministers meeting-ah hian Kolasib bialtu MLA, FCS&CA Minister Pu K. Lalrinliana, tuna ramri a awm mek tih loh chu member dang an kalkim a ni. MLA engemawzat ramri a kal an awm tawh bakah vawiin Minister te pawh a remchan dang anga ramri boruak a hmun a zuk ngaihven tura intirh ni se an ti.

Meeting zawh ah hian Home Minister chu Chief Secretary leh Home department hotuten tawiawmin, thuhthar lakhawmtute nen an inkawm bawk.