No.6224/2020-2021

Dated Serchhip, the 18th October, 2020: Vawiin (Pathianni) hian Serchhip DC Meeting Hall ah Pu Kumar Abhishek, IAS, DC chuan nizan lama Assam leh Mizoram ramria buaina thleng chungchang leh chumiin Serchhip district chhunga nghawng a neih theihte sawi puiin tlawmngaipawl hrang hrang aiawhte nen an thukhawm.

Bawrhsap chuan, Mizo mipuite rilru natna a hriatthiam pui thu leh hun rei tak ata harsatna an lo tawh tawh dante a hriatthiam pui thusawiin; buaina chin fel nana buaina bawk chawhchhuah erawh a fuh ber loh theih thu a tarlang a. Ramin dan kan neia, dan ang taka chin fel tuma hmalak a that a rinawm thu a sawi a ni. Bawrhsap chuan, tunah kan district chhungah non-Mizo tam tak hna hrang hrang thawkin an awm mek a, chutiang bawkin mizote pawh Assam state ah engemawzat an awm bawk a. He buaina chungchang engmah hre lem lo, mawhphurhna engmah nei ve hauh lote an ni ang, chung miten he buaina nghawng thalo an tawrh loh nan theihtawp chhuah tlang tura sawmin, harsatna a awm chuan district administration in chak taka  a umzui zel tur thu a hrilh a ni. Thuthang diklo, mipuite tichiai thei theh darh lo tura fimkhur turin mipuite a chah bawk a, Media mite pawh hetiang kawnga kan him theih nana thawhpuiah a sawm a ni.

He hunah hian Pu PC Laltanpuia, MPS, Addl. SP pawhin thusawiin, ramri boruak leh a nghawng thil thalo awm palh thei te ven kawngah tlawmngaipawl hrang hrang te thawhpuina a ngen a ni.

He hunah hian Serchhip NGOs Co-ordination Committee aiawhte, MUP aiawhte, YMA aiawhte, MHIP aiawhte, MZP leh MSU aiawhten thusawina hun an hmang a. Boruak muanawm tak hnuaia engkim kalpui tha an tih thu an sawi rualin, Pathianin min pek an chenna ram venghim tur chuan engkim an huam thu an sawi a. Serchhip in Bawrhsap bengvar leh mipuite zai ngai thiam tak kan nei chu lawmawm an tih thu an sawi hlawm a ni. MZP leh MSU aiawhte chuan an General Headquarters lam thuchhuak angin Non-mizo chu thuleh awm hma chu an sahimna atana pawn chhuah an khap thu an sawi a, YMA aiawh pawhin vawiin veka Central YMA CEC rorel a zira hmalakna thar an neih theih thu an tarlang ve bawk. 

Meeting ah hian Pu Lalmuansanga Ralte, Addl. DC te, Pi C. Lalduhzuali, SDO Sadaar te leh official pawimawh dangte pawh an tel a ni.