No.1634/2021-2022

Aizawl 30th July 2021: Vawiin khan July ni 27, 2021-a Mizoram sawrkarin Mizoram leh Assam ramri buai ngaihtuahtu tura din Boundary Committee chu an Chairman Pu Tawnluia, Dy. Chief Minister hovin Forensic Science Laboratory Conference Hall, MINECO-ah an thukhawm a, Boundary Committee memberte bakah sawm bik mi pawimawhte an tel a ni. 

 Mizoram-Assam Boundary Committee ah hian Deputy Chief Minister Pu Tawnluia chu Chairman niin, Home Minister Pu Lalchamliana chu Vice Chairman chu a ni. Member te chu; Minister of State pathum - Pu K. Lalrinliana, FCS&CA etc., Pu Lalruatkima, DIPR etc., leh TJ. Lalnuntluanga, Law & Judicial etc. te bakah Chief Secretary, Addl. Chief Secretary, Mizoram Police DGP, ex- MP (LS) Pu CL. Ruala, Pu Lalbiakzama, Home Secretary (rtd), Prof Jangkhongam Doungel, MZU, Dr. Joseph K. Lalfakzuala, Asst. Professor, T. Tomana College te bakah Recognized Political Party atangin mi pakhat theuh, NGO Coordination Committee-a tel YMA, MUP, MHIP, MZP leh MSU aiawh pakhat theuh, Joint Action Committee on Inner Line Reserved Forest Demand aiawh pakhat te an ni a. Home Secretary chu Committee Member Secretary a ni. 

Vawiina Mizoram Boundary Committee thukhawm chuan uluk taka an sawiho hnuah hetiang hian thutlukna an siam a ni: 

1. Mizoram-Assam Boundary siamfelna atan Inner Line of 1875 hi Mizoram hmar lam ramri demarcate awmchhun a nih avangin hman tha kan tiin kan dinna ngaiah kan la ding reng a ni.

2. Ramri buaina hi tharum hmang a tihfel chi ni ah kan ngai lova, inbiakna Ieh sawihona hmanga tihfel theih ni se tha kan ti. 

3. Ni 26.07.2021 a Assam Police ten Vairengte a Mizoram Police Post rawn Iuhchilh thut a, an rawn luahlan (outnumber) leh silai an hmetpuak hmasa kha kan dem tak zet a. Kan ram chhunga he pumpelh theih thil thleng avanga mi engemawzatin nunna an chan leh hliam an tuar hi pawi kan ti takzet a ni. Huaisen taka kan Police te leh Vairengte mipuiten an lo do let a, an Post ngai an luah leh thei hi ropui kan tiin kan chhuang a ni. 

4. Memorandum for setting up of Boundary Commission for Settlement, Delimitation, and Demarcation of Boundary between Mizoram and Assam (2018), All Political Parties Presidents, All NGO Presidents leh JAC ten hming an ziah hnan (signed) tawh chu a tul anga siamrem leh ennawn ni se. Hemi atan hian Sub-Committee/Working Group din ni se kan ti. 

5. Mizoram-Assam ramri buai chungchanga Sawrkar hmalakna te hi a tha kan ti a, huaisen taka hma la zel turin kan ngen a ni. 

6. Ramri chungchang hi hnam thil a nih avangin Mizo mipuite tangruala thapui thawh zel leh harsatna a lo awm deuh pawh a tuarchhel taka lo dawh hram hram turin mipui kan ngen a ni. 

7. Boundary buaina avang hian hnam dangte chunga harsatna siam lo turin Mizo zawng zawng kan ngen a ni. 

8. He Boundary Committee hian kan pi Ieh pute chenna ram chin chu humhim zui zel turin theihtawp a chhuah dawn a, Zoram mipui ten i tawiawm zel ang u. 

ZORAM HI KAN RAM A NI.