Chief Secretary Pu Lalnunmawia Chuaungo chuan vawiin khan thuthar thehdarhtute (media) NIC Video Conferencing Hall-ah kawmin COVID-19 laka mipuite himna tura nizana Office Memorandum chhuah a Mizoram lock down (inkharkhip) tur puan a nih chungchanga mipuite hriattur leh zawmtur pawimawh a sawifiah a. Chungte chu a hnuaiah hian tarlan a ni.

1.       Dawr khar vek a nih rualin nitin mamawh (essential commodities) mipuiten an lei reng theihna turin nitin mamawh zawrhna dawr erawh hawn phalsak an ni. Heng lei turte hian Local-level Task Force Chairman (Local Council Chairman emaw Village Council President) an hrilh ang a, annin ruahmanna an siam ang. An remruatna ngaihchan tur a ni a, dawrkaitn a man MRP aia to in an hralh tur a nilo. Hemi chungchangah hian Local-level Task Force ten thuneihna sang tak an nei a, an ruahmanna zawm tur a ni.

2.       Essential services kangthelh pawl (Fire & Emergency services), tui leh kawlphetha (power & electricity) supply tute, bawnghnute sem tute, mipuite a lova kan awm theihloh ang chi te a huam tel lo.

3.       Dan leh thupek kengkawhtu police, excise & narcotics bakah COVID-19 dona chungchanga hmalatu sawrkar hnathawkte leh anmahni puibawmtute a huamlo.

4.       Sawrkar kum tawp (financial year tawp) thla a nih avangin loh theih loh a zawh ngei ngei ngai, time bound work hna tam tak a awm a, heng hna khawihtu sawrkar hnathawkte leh sawrkar hna pawimawh dang khawihtu sawrkar hnathawkte a huam tel lo.

5.       Secretary to Government of Mizoram, Head of Department leh Head of Office ten office ah awm ngei se an tih ho an hrilh ang a office an kal ang, a dang zawng chu anmahni in theuh ah an awm ang a, telephone emaw electronic media, internet hmang tangkaiin hna an thawk ang. Office kai turte chuan an chenna atanga office an kaina turah sawrkar motor kawlin an motor kawl an hmang ang a, sawrkar motor kawllo mimal motor emaw private transport dang hmang duh ten an hmang thei ang. Mahse an chet velna ah official identity card (office/department ID) an keng ngei ngei tur a ni.

6.       Motor intlanchhawk chungchangah lirthei zawng zawng tlanchhuah khap a nih avangin sawrkarin phalna a pek ho tihloh chu tlanchhuah phalloh hrim hrim a ni.

7.       Bank zingah sawrkar sum chevel khawihtute leh sawrkar department hrang hrangten account an neihna branchte an inhawng thei ang a. Staff zawng zawng kal vek a ngai lova, a kal tur chin chu Branch manager emaw hotu hetiang lam ruahmantu ten an siam rem ang. Bank inhawng mahse mipuite tan dawr a remchanglo, online banking leh ATM kaltlangin mipuite chuan an dawr tur a ni.

8.       ATM hi mipuiten an hman tangkai tura hawn reng tur a ni.

9.       Damdawi zuarte inhawng tura tih an ni a, hetih rual hian damdawi zuartuten Local level task force ten remruatna an siampui ang leh daktawr prescription angin an hralh ngei ngei tur a ni. A man pangngai aia to a hralh loh tur a ni.

10.   Thlawhtheihna service tihtawp a nilo, emergency thil atan a tangkai bakah Mizorama lo haw turte tan an service a la ngai.

11.   Vairengte kaltlangin nitin mamawh essential commodities/service lakluh phal a ni

12.   Khualzin tangkhang laklawhte uluk taka screening an nih hnu ah a him ni a hriatte chu Mizorama an rawn luh remtih a ni. Hetih rual hian Mizoram an rawn luh atanga an thlenna tur khua/Veng (destination) Local-level Task Force Chairman hnenah phalna an dil ang a, annin phalna an pe ang. Phalna an pek hnu ah motor hman tur number, driver hming leh address, contact number, an kal ni tur leh an haw ni tur, passenger an phurhna tur hming leh an thlenna tur, cntact number leh address engkim permit an pekna lehkha ah a awm tur a ni a, hei hi vawn that tur a ni.

13.   Khualzin Lengpui Mizoram lo thlengte tan Mizoram an rawn luh hnu a an thlenna tur (destination) an thlen hma chu kawng lakah teihawi, riah, chawlh khawmuan phal a nilo. Nileng zankhua in a tul chuan an tlan mai tur a ni. An kalna tur direct a thlenna tur motor nei remchanglote chu an rawn luhna hmun azirin Lengpui, Vairengtea Quarantine centre ah dah an ni ang, Aizawl emaw hmundanga an chhungte, thiante bula riah a theihloh. Direct a an khua/veng thlenna tur motor an ruahman fel theih hunah chauh quarantine centre atang chhuah an ni ang. Ruahmanna an siam theilo a nih chuan ni 14 chhung quarantine na hmunah enkawl an ni ang.

14.   India ram pawn atanga Mizoram rawn luh tumte chu tum lui lo tura thurawn pek an ni a, an ticket neih sa pawh cancel mai tura thurawn pek niin an awmna hmun theuhah inveng fimkhur tura thurawn pek an ni bawk.

15.   Mizoram pawn atanga rawn lut reng reng natna emaw harsatna emaw pawh nei miahlo ni mahse home quarantine tih tur a ni. Khub ro, khawsik leh thawk lama harsatna nei (COVID-19 symptoms) chu isolate tur an ni.

16.   District Headquarters zawng zawngah Quarantine facilities ruahman a ni a, Home quarantine na tur hmun remchang neilote chuan hei hi chhawr tangkai tur a ni a, Health department in home quarantine inkaihhruaina a siam zawm theuh tur a ni a, a zawm famkim theilo chuan sawrkarin quarantine facilitiers a siam hi hman tur a ni.

17.   Khunghran (quarantine) ten harsatna an nei a nih chuan COVID-19 helpline ah in report thuai tur a ni a, anmahni tanpui turin medical team an inring reng a ni.

18.   Hostel/Residential institutions hrang hrang neitu leh enkawltuten an khar hi sawrkarin rem a ti lo. Hostel a zirlai etc. him taka awm sa chhuah darh tir hi a himlo zawk a ni.

19.   Lock down chungchanga hriatchian duh nei chuan State-level Task Force Chairman(Chief Secretary) hnenah emaw District -level Task Force Chairman (Deputy Commissioner te) a zawhchian theih ang.

20.   Bawlhhlawh paih motorte hi essential service an nih avangin khap an nilo, a pangngaiin an kal ang.

21.   Accredited journalists leh chanchinbu semtute lock down hian a huam lo. An hna thawhna hmun an panna leh haw na bak kal phal a nilo.

22.   Airport a khualzin lo haw hmuaktu motor khalhtu driver bak midang kal phal a nilo, Local-level Task Force phalna an la ngei bawk tur a ni.

23.   Lock down vanga harsatna tawk chhuanchham leh midang tupawh an awm chuan Local-level Task Force hriattir tur a ni a, anni hian ruahmanna an siam ang. An harsatna sukiang turin sawrkar a inhuam reng a, a tlanchhe dawnlo.

24.   ILP pekchhuah khap a ni.

25.   Essential Commodities Vairengte kaltlanga rawn lut a chatlak lohna turin sawrkarin theihtawp chhuahin hma a la a, mipuite tan hlauhthawn tur a awmlo.

26.   Testing laboratory chungchangah hriattur pawimawh chu sample testing laboratory hi duh duh huna neih mai theih a ni lova, tunah hian sawrkarin sawrkar laipuiah a thlen mek a ni. Testing laboratory sample test tura Guwahati a thawn chungchangah harsatna kan la tawk lo, a tul angin sawrkarin hma a la zel a ni. Rinhleh zawng zawng hi test vek tur a nilo,  sawrkar laipui kaihhruaina anga fimkhur taka hma lak a ni a, mipuite chi-ai lo tura ngen an ni a, sawrkar hmalakna a rintlak tawk a ni.