Ni 21.3.2020 zan dar 7:00 khan Dawrpui Multipurpose Center-ah Aizawl East-II chhunga Covid-19 leh a kaihhnawih harsatna awm thei chungchanga hmalak dan tur Bialtu MLA & Minister Pu Robert Romawia Royte kaihhruainain Councillor, Local Council Chairman leh Branch YMA President theuhten Emergency Meeting an nei.
Robert Romawia Royte chuan Covid 19 chungchanga Mizoram Sorkar hmalakna tlangpui sawiin Central YMA leh Kohhran te nen tha taka thawhho a nih thu a sawi a. Aizawl East-II bial chhunga veng tinah Kohhran leh tlawmngai pawlte COVID-19 hrileng dona kawnga an tanrualna te avangin lawmthu a sawi. Bialtu MLA chuan Mizorama Partial Lockdown lo awm tura inbuatsaih lawk a tul thu sawiin Aizawl East-II bial chhunga ei leh bar tur tlachham an awm palha pek atan buhfai quintal 200 chu sem tura dah that a nih thute Bial mipuite chu chi-ai lo tur leh fimkhur taka awma Sorkar thu awih turin a chah a, bial chhung khawtlang hruaitute, NGO te leh Task Force te chu Covid 19 dona kawngah eng hunah pawh phone, whatsapp te pawha a tul hun huna amah be pawp zung zung turin a chah a ni. Minister Pu Robert Romawia Royte chuan Mizoram Sorkarin COVID 19 dona kawngah chak takin hma a la zel a, hemi kawnga thawkrim tak takte pui leh tawiawm turin mipuite a sawm bawk a ni.
Pi B.Lalawmpuii, Bialtu Councillor pawhin YMA kaltlanga sem turin mask leh hand sanitizer a chah mek thu a sawi a, Sorkar hmalakna tha a tih thu sawiin thlawp theuh a tul thu a sawi a ni. Dr Lalchhandama, Saron Veng Branch YMA Vice President hnen atangin COVID-19 chungchang report tawi ngaihthlak a ni bawk.
Aizawl East-II huamchhung veng sariha Local Council Chairman leh Local Task Force Chairman ni bawk te leh Branch YMA President theuhte chuan Sorkarin Partial Lockdown tura hma a la chu an thlawp thu an sawi a, bial chhung mi harsate chhawmdawl nana Bialtu MLA leh Councillor-ten ruahmanna an siam pawh lawmawm an tih thu an sawiin theihtawp chhuaha an veng theuha tan lak an tum thu an sawi a ni. Aizawl East-II MLA Bial chhung Veng sariha Local Task Force te kalkim vekin an hmalak dan tlangpuite report an pe a, State pawn atanga veng chhunga lo hawte umzui that an tum thu an sawi bawk.
