General Administration Department-in Office Memorandum Ni 21.3.2020 a chhuah chungchangah zawhna tam tak dawn a ni a. Heng zawhnate sawifiahna bakah a hnuaia thupekte hi ramchhung mipuite COVID-19 laka kan him zawk nan mipui leh Sawrkar hnathawkte zawm turin Mizoram Sawrkar chuan “The Mizoram Epidemic Diseases (COVID-19) Regulations, 2020” hnuaiah a chhuah a ni.He thupek hian Ni 29.3.2020 thleng a huam ang.
1. Mizoram Sawrkar hnathawkte office kal chungchang: Sawrkar sum leh thildang hmanhmawh thlak bik khawih turte hi office kal tur an ni a. Office kal turte hi Commissioner/Secretary, Head of Department leh Head of Office ten an hnuaia hnathawkte kal dan tur an hriattir ang. A dang zawng chu mahni in lamah theuh duty in an awm ang a, telephone emaw electronic media hmangin a tul anga biakpawh theih tur leh hna thawka koh theih turin an awm ang. Hei hian Sawrkarin dt. 20.3.2020 a thupek a lo chhuah tawh, Group B, C & D chanve office kai tura a lo ruahman tawh chu a tidanglam a ni.
2. Central Sawrkar, PSU leh Private Sector hnathawkte chungchang: Central Sawrkar, PSU leh Private Sector hnuaia mipuite mamawh (essential services) petute heng – Postal Services, NIC, DDK, AIR, BSNL leh Private telecom company hnuaia hna thawktute office kal dan tur chu heng Department/Organisation hotuten thutlukna an siam ang.
3. Bank hnathawkte chungchang: Sawrkar sum chevel khawihtu Bank hrang hrang Branchte leh Sawrkar Department hrang hrangin Account an neihna Bank Branch zawng zawngte, Sawrkar transaction atan hawn an ni ang a. Mipui tan erawh dawr theih an nilo ang. Online transaction erawh chu a theih reng ang. ATM zawng zawng tha takin a function tur a ni. ATM a kal tur hian para – 5 a tarlan angin Local Level Task Force ruahhmanna ang a kal tur a ni. A chunga tarlan Sl. 1, 2 & 3 hnuaia hnathawka office kal turte hian office kalna atan hian Sawrkar/Organisation motor emaw mimal motor emaw an hmang thei ang a. Heng motor-te hi in atanga office kalna atan leh office atanga in lama hawna atan chauh hman tur a ni. Sawrkar/Organisation hnathawkte hian Official ID card an keng ngei tur a ni.
4. Mipui mimir chhuah khapna hian hemi chungchanga Sawrkar Office Memorandum Ni 21.3.2020-a tarlan tawhte bakah mipuite mamawh (essential services) petu - chanchinbu semtute, bawnghnute semtute leh bawlhhlawh paihtute a huam lovang.
5. Nitin mamawh (essential commodities) lei dan tur chungchang: Nitin mamawh (essential commodities) lei ngaite chuan anmahni awmna veng/khua Local Level Task Force on COVID-19 hnenah an in report ang a, anni hian ruahmanna an siamsak ang. Chutiang ruahmanna ang chuan an thil mamawhte an lei thei ang. Sawrkarin thupek a lo chhuah tawh angin nitin mamawh (essential commodities) dawr leh damdawi dawrte hawn theih a ni a. Vengchhunga dawr hawn theih chin hi Local Level Task Force ten an enfiah thin ang a, dawrah hian a nghaktu bak midang awm khawmuan phal a ni lo.
6. Damdawi lei chungchang: Damdawi mamawh lei chungchangah pawh hetiang hian Local Level Task Force ten ruahmanna an siam anga lei tur a ni. Damdawite pawh doctor-in a chawh (prescribe) bak mi pakhatin lei awih a nilo ang. Damdawi zuarte pawhin doctor-in a chawh (prescribe) bak an hralh tur a nilo.
7. Ramchhunga luh chungchang: Loh theih loh thilah lo chuan Mizoram pawn atanga Mizoram lo luh hi tih loh tur a ni.
i. Mizoram pawn atanga loh theih loha lo lut te chuan anmahni awmna/chenna hmun theuh an thlen theihna tur atan motor an mamawhte tlanchhuah phalna (permit), Mizorama an lo luhna hmun (Vairengte/Lengpui) emaw, an hawna tur khua/veng bialtu Local Level Task Force Chairman (Local Council Chairman/ Village Council President) emaw hnen atangin an la thei ang. Amaherawhchu, Driver bak, midang a hmuaktu kal tel phal a nilo. Hengte hi permit lehkhaah hian tarlan ngei tur a ni.
Vehicle registration number, eng motor nge.
Driver - Hming, address, contact no., A lam tur - Hming, home address, contact no.
A lamna tur hmun (Lengpui/Vairengte)
Kal ni tur leh haw ni tur.
ii. Ram pawn atanga Mizoram lo luhna Lengpui Airport leh Vairengte atangin mahni chenna hmun/inah an haw tlang nghal tur a ni. Kawng laka cham phal a nilo.
iii. Lengpui emaw Vairengte emaw atanga mahni chenna hmun kaltlangna tur motor neilo chu Vairengte emaw Lengpui emaw a indahhranna quarantine facility siamah dah an ni ang. Anmahni chenna hmuna kaltlang theihna tur motor an neih veleh an chenna hmuna haw phalsak an ni ang.
8. Home quarantine: Mizoram pawn atanga Mizoram lo lut zawng zawngte Home quarantine in ni 14 chhung an inkhung hrang ngei ngei tur a ni. Hetianga Home quarantine tihna tur hmun nei remchanglo te chu District Level Task Force on COVID-19 emaw Local Level Task Force on COVID-19 emaw in quarantine-na tura hmun an buatsaihah Ni 14 chhung quarantine in an awm ngei ngei tur a ni.
9. Quarantine a awm chhung hian hriselna lama insawiselna nei chuan State COVID-19 Helpline number a hnuaia tarlanah hian in report vat tur a ni.
Toll free - 102,
0389-2323336,
0389-2318336
10.Isolation chungchang: Mizoram pawn atanga Mizoram rawn lut zawng zawngte hi Mizoram an rawn luhna (Vairengte/Lengpui Airport) a Medical Duty ten Medical Screening tihsak vek tur a ni a. Mizoram an rawn luh a Medical Screening an tih lai a khawsik, khuhro leh thawkna lama harsatna neite leh Medical Team-in tul ni a an hriatte chu hetianga damlote dahhranna Sawrkarin a siamah dahhran an ni ang.
11.Mizoram chhuahsan chungchang: Mizorama awm mek State pawnlama chhuak duhte chuan Mizoram an chhuahsan na tur motor tlan phalna an khawsak mekna hmun bialtu Local Level Task Force Chairman (Local Council Chairman/ Village Council President) atanga lain an chhuak thei ang. Hemi atan hian hengte hi permit lehkha ah hian a tel tur a ni.
Vehicle registration number, eng motor nge.
Driver - Hming, address, contact no.
Passenger list - Hming, address, contact no.
Kal ni tur leh haw ni tur.
Kalna tur hmun.
Heng motor-te hi kawng lakah tei khawtlai/zanriah phal a ni lo.
12.Hostel khar chungchang: Ramchhunga Hostel thenkhat ten an hostel an khar ni a hriat a ni a, COVID-19 laka invenna kawnga harsatna siam thei anih bakah hostel a awmte nasa taka a tihbuai leh tih chiai avangin hostel te hi khar loh tur a ni.
