Nimin khan Tripura Relief Camp-a paruk atanga Mizoram mi leh sa Reang(Bru) te hruailet hna thawh 8-na atana inbuatsaihna chu Mizoram Sawrkar officials ten Camp hrang hrangah endik hna kalpuina thawh chhunzawm a ni. Mamit District, Lunglei District leh Kolasib District atanga Officials kalte hian Camp hrang hrang ah chhinchhiahna Identification hna hi an thawk a ni.

Identification kalpui mekah hian Mizoram let duh ngeite chhinchhiah an nih bakah 2016 Identification kalpui laia, chhungkua la chhinchhiah lohte chu Identification ti leh tura ruahmanna siam a nih angin chhinchhiah tel an ni bawk.

Nimin-a Panisagar Sub- Division hnuaia Relief camp pathum Kaskau, Khakchangpara leh Hamsapara   atanga Mizorama let duha, hming pe te hi Kaskau Camp atangin  chhungkaw 174, puitling 797 leh naupang 340 an vaiin mi 1137 an ni a, tihian Kaskau camp atanga nihnih chhung hian Mizoram let duh inziak lutte hi Mamit District atangin Chhungkaw 367 niin puitling 1669 leh naupang 697 an vaiin mi 2366 an ni. Kolasib District chhunga awm tur inziak lut tawh te hi chhungkaw 27, puitling 158 leh naupang 36 an awm bawk a ni. Hamsapara camp atang hian 2016 a Identification paltlanglo chhungkaw 17 te chhinchhiah thar niin Khakchangpara camp atang hian Re-Identification chhungkaw khat leh 2016 Identification paltlanglo identified leh hi chhungkaw 5 an awm bawk.

Nimin vek hian Kanchanpur Sub Division hnuaia Relief Camp pathumte Asapara, Naisingpara  leh Hazacherra Camp ah hian Naisingpara Camp atangin 2016 Identification paltlanglo chhungkaw khat Identified a ni bawk. 

Reang(Bru) Mizoram mi leh sa Tripura camp a tanga lakletna tura endik hna Camp hrang hranga neih hi boruak  tha tak hnuaiah neih  niin vawiin hian chhunzawm leh a ni ang.