Nimin February 9, chawhma khan Transport Minister Pu PC Zoram Sangliana leh Forests Minister Pu H. Rohluna ten UPA Chairperson Pi Sonia Gandhi chu a chenna 10 Janpath, New Delhi-ah an hmu.

Minister pahnih te hian Mizoram sorkar flagship programme NLUP leh thalaite hmakhaw thlir lawkna programme-ah te sum mamawh zat Central in a tihhlawhtlin sak mek avangin lawmthu an sawi a. Pi Sonia chuan Pu Lal Thanhawla kaihhruai sorkar mamawh leh tul an hrilh leh ziak a an pekte chu chhangin Pu Hawla nen an sawi dun tawh thu te, a lehkha pawh a lo hmuh tawh thu leh engemawchen hma a lo lak tawh thu a hrilh a. A tihlawhtling theitu tur te hnenah amah ngeiin a bawhzuisak tur thu a sawi a ni.

A hrisel lohna avanga USA-a a inenkawl laiin Mizo ten an lo tawngtaipui thin thu leh a dam leh avanga Pathian hnena lawmthu hrilh chunga an tawngtaipui zel thu te Pu Zoram Sangliana te thian dun hian an hrilh bawk. Pu Zoram Sangliana chuan Mizo Shawl, Cheraw Guinness World Record CD, Cheraw World Record pholanna No leh Mizoram Printing and Stationery Department ten 2012 Calendar an siam chu a pe a. Pu H. Rohluna pawhin Pi Sonia hnenah hian pangpar a pe bawk.