Mizoram MLA Inthlanpui November Ni 28-a neih zawh takah harsatna leh dan leh thupek bawhchhiatna liantham hriattur awm lova ralmuang taka neih a nih avangin Mizoram Police chuan mipui leh NGO, MKHC, Media, inthlan buaipuitu leh political party zawng zawng chungah lawmthu an sawi a. MPF-te thawhrimna avangin ECI kaihhruaina tha taka zawm a ni chu lawmawm an ti hle a. District hrang hranga SP-te leh Election Official-te rim taka an thawhna zarah felfai taka inthlanpui buatsaih a ni chu chhuanawm tiin state dangte pawhin an entawntlak khawpa inthlanpui thianghlim leh muanawm neih a ni chu lawmawm an ti a. Mizoram Police hotuber, Pu Balaji Srivastava IPS, DGP Mizoram pawhin ralmuang taka dan leh thu pek kenkawh anih avangin police duty zawng zawngte chungah lawmthu sawina ziakin a siam nghe nghe a ni. Hetianga Mizoram pumpuia Polling station 1164 leh abika Polling station 15 lai Bru-mipuite tana Kanhmun, Mamit district-a siamah pawh harsatna awm lova mipuiten vote an thlak theih avangin lawmthu an sawi a. Thuthar thehdarhtute (Media) chungah tha taka an thawhhonaah lawmthu an sawi bawk a ni. 

EVM Strong room-te Security (CAPF, SAP, MRP) ten uluk takin an venghim mek a. December Ni 11, 2018 hian district hrang hrangah vote chhiar a ni dawn a, he hunah pawh hian ralmuang leh boruak tha tak hnuaia vote chhiar a nih theih nan leh inthlan result puan a nih hnuah pawh boruak tha tak kan neih zui zel nan mipuite, NGO-te, MKHC-te, MPF-te, Media-te, inthlan buaipuitute leh political party zawng zawng dan leh thupek ken kawh kawngah min tanpui leh theuh turin kan ngen a ni e.