Nimin tlai khan November ni 28, 2018-a MLA Inthlanpui 2018 neih zawh taka Lawngtlai District-a constituency pathuma vote tlak dan he'ng bial pathuma General Observer Pu P. Bala Kiran IAS hovin thlir ho a ni.
He hunah hian Lawngtlai District chhunga assembly constituency pathuma Returning Officer leh Asst Returning Officer-te leh political party hrang hrang ai awhte an tel a. Lawngtlai District-a inthlan kalpui dan leh vote tlak dan enfiah a ni. Assembly constituency khata vote tlak dan chawhrual aia za zela 15-a tam emaw, za zela 15-a tlem emaw vote tlakna polling station a awm chuan post-poll scrutiny hmang hian chu'ng polling station-te chu zir bing tur a ni a. He hunah pawh hian Lawngtlai District chhunga assembly constituency pathum - 36-Tuichawng (ST) AC, 37-Lawngtlai West (ST) AC leh 38-Lawngtlai East (ST) AC-tea chuti ang vote tlakna polling station-te chu thlir ho niin, thil fel hlel leh rinhlelhawm a awm lo tih pawm tlan a ni.
Hemi zawh hian General Observer leh political party hrang hrang ai awhte nen hian constituency tin strong room-a EVM-te a him leh him loh en ho a ni a. A him ngei tih finfiah a nih hnuah kalha seal hmanga char fel nghal a ni bawk.
