November ni 28, 2018-a Mizoram MLA Inthlanpui 2018 buatsaiha Lawngtlai District chhunga 36-Tuichawng (ST) Assembly Constituency hnuaia polling station pakhat, 36/35-Ajasora PS-ah vote thlak tura intlarte'n ni khat chhunga vote an thlak zawh hman loh avangin, Election Commission of India (ECI) chuan December ni 4, 2018-ah hemi polling station-ah hian a thara vote thlak ṭha leh turin a hriattir a. Hemi atana inbuatsaih dan tur leh thil pawimawh hrang hrang sawi hovin nimin tlai khan Lawngtlai DC Conference Hall-ah District Election Officer Pu N. Chakhai MCS hovin Returning Officer-te leh SP te, district election official-te leh team hrang hrangte an thu khawm.

He hunah hian felfai leh tluang taka inthlan buatsaih a nih theih nana thil ṭul hrang hrang sawi ho a ni a. Inthlan pangngaia harsatna awmte tar lan niin, harsatna awm leh thei hrang hrang ven dan tur te, a hun taka vote thlak zo thei tura hma lak dan tur te, polling party turte leh team hrang hrang duty intirh dan turte sawi ho a ni bawk.

36/35-Ajasora PS-ah hian voter 1080 awmin, Inthlanpui ni-ah khan vote 714 a tla hman a. Amaherawhchu, hei hi ECI-in pawm loh tur tia a hnawl tak avangin December ni 4, 2018 (thawhlehni) hian tha thara inthlan buatsaih leh a ṭul dawn ta a ni.

Lawngtlai District-a constituency pathumah hian polling station 161 a awm a. Ajasora polling station tiam lo hian polling station dang 160-ah voter 79141 awmin, vote 63901 (81%) a tla a ni.