No.2405/2021-2022

Aizawl the 30th September, 2021:  Pu C.Lalrosanga MP(L.S) Pu K.Vanlalvena MP(R.S), Pu Rosangzuala OSD to Chief Minister leh Pu Amjad Tak IAS, Resident Commissioner, Mizoram House, New Delhi te chuan nimin tlai khan Pu Rajesh Bhushan Secretary, Ministry of Health & Family Welfare chu a office ah hmu in Mizoram in Covid 19 hripui vanga harsatna a tawh mek chungchang ah Central sawrkar tanpuina an ngen.

Pu C.Lalrosanga chuan Union Health Secretary hnenah Mizoram dinhmun tlangpui a sawi a. Hri vei mek leh nitin hri kai thar an pun chak avangin Mizoram chuan he hripui do nan hian damdawi leh covid dona hmanraw tam zawk a mamawhin Central sawrkar tanpuina a mamawh tak zet tih a hrilh a. Pu Bhushana chuan Covid hripui do na tura Central sawrkarin State leh UT zawng zawng tan Emergency Covid Response Package(ECRP)hnuaia a sum dah Rs.14744.99 crore atangin Mizoram chu Rs.44.38 crore pek a nih thu leh First installment Rs.19.94 crore chu pek chhuah a ni tawh tih a lo sawi a. First installment hmanna thehluh veleh a bak sum la awm pawh pek chhuah leh nghal tur a ni tih a sawi.

MP te chuan Covid hripui vanga harsatna chi hrang hrang te leh Mizoram sawrkarin a hmachhawn dan tlangpui tarlangin vaccination programme kalpui dan pawh an sawi a. Mizoramin vaccination programme hi a tih țhat viau rualin hri kai thar an pun chak em avangin ICU khum tam zawk te, khawl țha leh RT-PCR mobile van te chu mamawhna a nasa hle a ni tih an sawi a. Hripui vanga chhiatna hmachhawn turin ECRP hnuaia Mizoram tana sum ruahman pangngai piah lamah Central sawrkar tanpuina a mamawh tak zet tih an hrilh a. Hei bakah hian Mizorama covid dinhmun uluk taka rawn enfiah a zirchiang turin Expert Team rawn tirh ni se tiin Union Health Secretary hnenah an sawi bawk a ni.


Pu Bhushan chuan MP ten Mizoram dinhmun an sawi leh harsatna an thlen te chu thuneitu sang zawkte nen lo sawiho a nih tur thu leh Mizorama Expert Team rawn tirh thuai a nih tur thu a sawi a. Covid damlo te enkawlna dripa khai tel chi damdawi manto, Rs.120 ,000/- man Monoclonal Antobodies Cocktail(MAC)chu Mizoram sawrkarin an dil chuan a thlawnin an pek theih thu a lo hrilh bawk a ni.


Union Health Secretary chuan covid hripui dona kawnga hma a lak danah Mizoram sawrkar chu fakin tun thlenga covid thihna a la thleng tam lutuk lo chu thil lawmawm tak a ni, a ti a. Hripui vanga Mizoram harsatna sukiang tur leh a tul anga sum leh pai tanpuina pe turin theihtawp chhuah a inhuam thu a lo hrilh a ni.

Attachment

  • Loading attachment...