No.2404/2021-2022

Aizawl the 30th September, 2021 : Vawiin khan Serchhip District Task Force on Beti Bachao Beti Padhao te chu an chairman Pu Kumar Abhishek, IAS, Serchhip Bawrhsap hovin DC Meeting Hall ah an thukhawm a, kum 2020-21 Action Plan kalpui tawh dan thlirletin, 2021-22 Action Plan tur an duang nghal.

“Fanu chu venghim la, zir puitlintir rawh” hmalakna hi Serchhip District ah kum 2018-19 atanga kalpui tan tawh niin Ministry of Women & Child Development, Government of India hnuaia hmalakna a ni a. Tun kum kal mekah hian a hmatawnga hnathawktu hrang hrangte tana training te, Media Campaign chi hrang hrang te, hmeichhe zirlai naupang zirna lama hlawhtlingte chawimawina thilte, hmeichhe naupangte tana “My Aim My Target Campaign” te leh Special Career Awareness Campaign leh Talk Show te, nu naupaite tanpuina te, district chhunga fanu thar lo piang zawng zawngte enna te neih a ni a, Action Plan hnuaia hmalakna tur chite thawh zawh deuh vek tawh an ni.

Hmalakna awm tawh chinte thlirlet a nih bakah hian kum lokal leh tur atana Action Plan duanna meeting hmasa ber neih nghal a ni a, line department ten an hmazawn atanga BBBP kalphung hnuaia thawh theih chi hrang hrangte thehlutin thuneitu sang zawkin an pawm tura thehluh leh tur a ni ang.