Mizoram Paite Tribe Council (MTPC ) in nimin khan Mimbungah Chief Minister Pu Lal Thanhawla an chawimawi a, Chief Minister hian Sialkal Range Development Council a hawng nghal.

Chawimawina inkhawm leh Sialkal Range Development Council (SRDC) hawnna Mimbung khelmuala neihah Chief Minister chuan chawimawi phulo chunga MPTC in an chawimawi chu lawmthu a sawi a. Mizo hnamah hian chi tam tak kan awm a, tawng tam tak a awm bawk a ni tiin, duhlian tawng kan tih Mizo tawng kan tih bawk hi kan hriatthiam tlan vek a ni a, amah pawhin a thiam chhun anih avangin a hmang a ni a ti a. Chief Minister chuan Zohnahthlakte hi Pathianin abik taka min siam kan ni tiin, khawvela sakhua lian ber ber Hindu, Islam leh Buddhist ten min hual chungin Chanchintha hmangin min rawn zawng chhuak a, A chanchintha hril turin min duh a, kan hril chhung chu tumahin min chimral tir a phal lovang a ti.

Chief Minister chuan Zohnahthlakte hian rorelna khat hnuaia awm kan duh a, Pathianin a hun a tihah chuan min awm tir mai hi ka beisei tlat a ni a ti a. Keini ho hi chhulkhat chhuak kan ni a, kan tawngte hi danglamna deuh awm mahse inlaichinna hnai tak nei vek a ni a, khawsak ziarang inang tlang kan nihnate hian chhulkhat chhuak kan nihzia a tilang a ni a ti a. Chuvangin hnamdang ten min zah nan leh min hlauh nan pawh inngeih taka kan khawsak tlan a tul a ni a ti a. Inla hrang tham pawh kan nilo a, rualkhai taka hmasawnna neih hi kan duh ber a ni a ti. Kan unau thisen zawmpui hel thenkhat ten an unau dangte hnenah tukluih chhiah khawn a, sawisa a an dawr khar tir an ni te hi a pawi hle a ni a ti. Ram hrang hrang India, Myanmar leh Bangladeshah te awmin leh India ah pawh state hrang hrang Mizoram, Manipur, Tripura leh Assamah te kan awm a, kan awmna theuhah a khua leh tui tha, mi rinawm leh dik nih kan tum vek tur a ni a ti a, kan ram luah chin zawng te hi kan humhalh tlat tur a ni a ti. Kan zavai hian intluk tlang vek hnam kan ni a, hnam dangte zah tura kan awm hi a pawimawh hle a ni a ti.

Bialtu MLA Pu H.Rohluna, School Education Minister chuan kan Chief Minister hian chawimawi hi a phu reng a ni tiin, helai khaw tlangdung a enkawl dan mai bakah mi dik leh remna leh muanna duhtu anihnaah te hian chawimawi hi a phu a ni a ti a. Sialkal tlangdunga chengte hrechiangtu anih angin mumal zawka hmasawnna kan neih theihna tura SRDC pawh hi min pek a ni a ti a. SRDC anih hma hian Board angin kum engemawzah alo kal tawh tih sawiin, Minister chuan Council Chairman atan sitting MLA a ni a, Secretary ah Ngopa SDO (C) leh member ah VCP te an ni a ti a. Inenkawl nan leh inrelbawlna turin budgetah Rs.50 lakhs dah a ni a ti a. Board anih atangin hna hrnag hrang 39 a thawh tawh thu a tarlang bawk a ni. Tunah hian SRDC Hqrs chu Mimbung niin, khaw panga dang Hrianghmun,Teikhang, Kawlbem, Selam leh Vaikhawtlang khua te a huam a ni.

Inkhawm hi Pu Damsavung, Council Executive Committee Chairmanin a kaihruai a. MPTC President Pu H.Dal Khen Khai chuan Pu Hawla an chawimawina chhan chu helai tlangdung chengte hmangaihtu leh an hmasawnna duha SRDC hial petu anih vang a ti a. Heng bakah Mizoram Legislative Assembly a Paite Hnam hriatpui a Paite Tribe recognition passed tu anihna avangte a ni tiin a hnena lawmthu sawi hi kan tih tur a ni a ti.

Chawimawina hun hi PTC Gen Hqrs, Manipur atangin an President Pu Vungsuanthang chuan Paite te hi Mizo kan ni tih kan chiang a, duhlian tawng kan thiam vak loh avangin Mizoram mipuite hian min enhrang palh ang tih hi kan hlau thin a ni a ti a. Mahni state Mizoram kan nei tih kan hriat hian kan thla a muang thin a ni a ti.

Pu Hawla te nupa hi Mimbung mipui ten zawnin an chawimawi a, chawimawina thilpek citation, puandum leh sial tuai tha tak hlan a ni a, Council hawnna lungphun a hawng bawk a, Churachanpur District Council hruaitute an tel bawk a ni.

Chief Minister hian tukin khan Teikhang a tlawh a. Vantlang inkhawm Teikhang Community Hall-a buatsaihah Zo hnahthlak te zinga tawng tam tak awm hi kan inzah tawn sak a ngai a, chi bil zawnga kal hi insuihkhawmna daltu leh ti thuanawm theitu anih kan hriat a tul a ti a. Sialkal Range Development Council hi Sialkal tlangdunga chengten hamthatna leh hmasawnna chak zawka an hmuh theih beiseina vanga din a ni a ti. Inkhawm hi Teikhang VCP Pu T. Ropianga’n a kaihruai a ni.