Nimin chawhnu khan Chaltlang Tourist Lodge-ah Tourism Minister Pu John Rotluangliana hovin Thalfavang Kut Organising Committee chuan Thalfavang Kut 2014, December ni 10 leh 12 inkara Tuirial Airfield a buatsaih thlirletna ‘Review Meeting’ an nei a. He meeting hi Deputy Speaker leh Aizawl East III bialtu MLA ni bawk Pu R. Lalrinawma pawhin hmanpui a ni.

Tourism Minister Pu John Rotluangliana chuan he kut hi Zoram mipuite kut a nih anga mipuiten an lo hlut sak chu lawmawm a tih thusawiin he kut hmangtu kal zawng zawng te leh a hlawhtlin nana an tha leh zung seng te chungah lawmthu a sawi a, Traffic zam avanga harsatna tawh erawh chu pawi a tih thu a sawi bawk. Organising Committee chuan kum dangah pawh Thalfavang Kut hi buatsaih zel nise tiin Nagaland Hornbill Festival khum thei tura hmalak chhoh zel nise tiin an duh thu an sawi. Tuirial Airfield hi kut lawmnan leh Tourism kaihhnawih thil chi hrang hrang atana hmun remchang tak niin heng thilah hian hman zawm zel theih dan a ngaihtuah tur thu Minister hian a sawi bawk a ni.