1148/2022-2023 

Aizawl, 5^th July, 2022 : Mizoram Police in kum 50-na an hman mek lawmna kal zelah Home Minister Pu Lalchamliana chuan vawiin khan PHQ Multipurpose Hall-ah “Mizoram Police 50^th Anniversary (Golden Jubilee) Disc a sem a, he disc hi Mizoram Police mi leh sate zawng zawng hnena sem tur niin, a hmahruai atan PHQ hnuaia Unit hrang hrang aiawhte hnenah vawiin hian sem a ni.

He hun puala inkhawm buatsaihah Home Minister Pu Lalchamliana chuan kum 50 chhungin Mizoram Police-in hmasawnna nasa tak a neih thu sawiin, Mizoram Police chu Mizorama chengte venghima thlamuantu an nih thinna hi a hlu a, mipuiten innghah nan leh thlamuantu atan an rin zel tura anmahni pawh tunlai thiamna leh boruak mila a tul anga inher rem zung zung thei tura inzir taima turin a chah a, COVID-19 hripui leng vanga sawrkarin  inrenchemna (austerity measure) a kalpui avangin Mizoram Police tihchakna tur leh tihhmansawnna tura ruahmanna awm sa leh phalna hmuh vek tawhte pawh duh anga chakin a tihhlawhtlin theih rih lova, heti chung chung hian sawrkarin an dinhmun  hriain a ngai pawimawh thin a ni a ti a. Theihtawp chhuaha hma lak chhunzawm zel a nih tur thu a sawi a ni.

Pu Lalchamliana chuan Mizoram Police chu invawng uluka discipline tha taka vawng tura chahin, taksa hrisel leh in fit taka awm reng tur an ni tih a sawi a, mipuite rawngbawlsaka venghimtu an nihna kawnga an mawhphurhna pawimawhzia hre thar zel tur leh mahni infuihna atana hmang thin tura chahin, social media hman kawngah pawh fimkhur lehzual turin a chah bawk a ni.

DGP Pu Devesh Chandra Srivastava, IPS pawhin thu sawiin sawrkarin mawhphurhna a pekte tha taka theihtawp chhuaha an hlen thin avangin Mizoram Police te an chhuanawm tih a sawi a, Home Minister-in an hmasawnna tur ngai pawimawha theihtawp a chhuahpui thinna ah lawmthu a sawi bawk a ni.

Vawiin Disc semna inkhawm hi Pu John Neihlaia, IPS, IGP (Hqrs) in a kaihruai a, Home Minister Pu Lalchamliana’n PHQ hnuaia Unit hrang hrang aiawhte hnenah Disc hi sem chhuakin, Pu Lalbiakthanga Khiangte, IPS. DIGP (Hqrs) in lawmthu sawina in hun a khar a ni.