Vawiin chawhnu dar 1 khan Mizoram Police DGP, Pu Thianghlima Pachuau, IPS, IGP Pu Zorammawia, IPS leh DIG(NR) Pu LT. Hrangchal, IPS te chuan Delhi Police atana lak Mizo nula leh tlangvalte kawmin, fuihna hun an hmang a. Delhi khawpuia Mizo Police 67 lai mai an han awm tur hi Delhi-a Mizo awmte tan pawh an thlamuanpuiawm tur thu leh an hnaa rinawm taka thawk tur leh Mizo mipuite aiawh an ni tih hrereng turin an chah.

Delhi Sorkar hian N. Delhi-a India hmar chhak mite him zawk nan leh harsatna an tawh pawha lo tanpui nghal thei turin India hmar chhak state hrang hrang atangin Police Constables an la a. Mizoram atangin tum 2 lak an ni a, a hmasa zawkah chuan mipa 7 leh hmeichhia 10 lak niin a thawh hnihnaah mipa 34 leh hmeichhia 16 lak an ni a, an vaiin mipa 41 leh hmeichhia 26 an ni.

Heng mi 67 te hian Ni March ni 30, 2016-ah Aizawl chhuahsanin April ni 2 ah Delhi-a an training-na tur hmunah an in report nghal ang.