Vawiin khan Mizoram Police chuan  Arya Mess, Police Headquarters ah  Raising Day an lawm a. He hunah hian Pu F. Lalremsiama, IPS(rtd) chu khuallian a ni.

Mizoram Police Raising Day lawmna inkhawmah hian Pu Neeraj Thakur, IPS, IGP (Intelligence) chuan inlawmna thu a sawi a, Pu L.R Dingliana Sailo, MPS, AIG-I chuan report pe-in Khuallian Pu F.Lalremsiama chuan Souvenir a tlangzarh nghal a. He hunah hian Police Service Medal, Police Station tha ber lawmman leh DGP Commendation Disc te sem a ni bawk a, Pu Zorammawia IGP chuan lawmthu sawina in hun a khar a ni.  

January ni 21, 1972 kuma Mizoram Union Territory a hlankai anih khan Mizo District-a Assam Police  ni thin chu Mizoram Police ah hlankai an ni ta a. Mizoram IGP hmasaber Pu J.J Verma chuan January Ni 21, 1972 atangin charge ala tana, hemi ni hi Mizoram Police Raising Day a pawm a lo ni ta a ni. Kumin hi Mizoram Police Raising Day champha vawi 46 na niin a ni tak hi Pathianni anih vangin January ni 22, a lawm a ni ta zawk a. Mizoram Police Unit hrang hrang ten mahni Headquarter theuhah Raising Day hi lawmin a lawmna pui ber hi G.S Arya Mess, PHQ, Aizawl ah neih a ni a. Kum 2022-a Mizoram Police Raising Day Golden Jubilee lo thleng tur chu ropui taka lawm an tum a ni.

Mizoram state a hlankai anih dawn khan  Mizoram Police chuan Police Sub-Division 9, Police Station 30 leh Police Outpost 11 an nei a, tun dinhmunah Police Sub-Division 17, Police Station 38 leh Police Outposts 14 neiin  Police 8897 an awm mek a. Tunah hian Mizoram Armed Battalion 3 (1^st Bn. MAP, 2^nd Bn MAP, 3^rd Bn MAP) awmin India Reserve Battalion 5 (1^st, 2^nd, 3^rd, 4^th,5^th IR Bn) an awm a, Armed Battalions ah hian Police 5475 an awm mek a ni.

Mizoram police din atanga kum 46 chhung hian ram tana nunna hlan police 56 an awm a, chutih rualin chawimawina dawng thahnem tak an awm tawh bawk a, chungte chu :

Mizoram Armed Battalions te hian Mizoram chhungah BOP hrang hrang  an veng a, Assam ah Counter Insurgency Operation hna thawk mekin, election hunlaiin India ram state hrang hrangah an duty thin bawk a ni.

Mizoram Police Raising Day Report-in a tarlan danin tunah hian cheng nuai 1555.79 senga sak tur Khatla-a Police Headquarters Building sak hna chu thawh mek a ni a. Cheng nuai 2842.28 senga sak tur Thingkah-a 3^rd IR Battalion Headquarter sak hna pawh thawh mek a ni.

Mizoram Police chuan Aizawl khawpui chhungah CCTV vuahin hmun 43 ah camera 186 an  vuah a ni.