Vawiin khan SP Conference Hall, Serchhip-ah ‘Mizoram Police Raising Day’ lawmna neih a ni a. Raising Day lawmna hi Addl. S.P Serchhip Pu Lalmuanpuia-in kaihruaiin SP Serchhip Pu Lalringdika chu khuallian niin he hunah hian police-te fuihna thu a sawi bakah AIGP & Secretary, Mizoram Police Raising Day Celebration Committee atanga thuchah a chhiarchhuak a ni. Police Pensioner-te aiawhin Pu H.Lalliana (Inspr. Rtd.) chuan thu a sawi bawk.

SP Serchhip Pu Lalringdika chuan Police Raising Day hmang tura kalkhawmte chu Raising Day chibai a buk a. Police-te chu sorkar hnathawk dangte aia training nei tha leh fing zawk an nih avangin, an service lai leh pension hnu pawhin khawi hmunah pawh awm se, khawtlang leh ram tan tangkai takin an awm tur a ni, a ti. Police atanga pension tawhte pawh inngaihsaka, inchhawmdawl tawn zel tur a ni a, a tul hunah chuan police hna la thawk thei an ni tiin pension tawhte pawh duhsakna a hlan bawk.

Mizoram Police  Raising Day ni tak nimin 21st January 2017 Pathianni a nih vangin vawiin ni 22.1.2018 (Thawhtanni) hian hman a ni a. Ni 21st Jan,1972 khan Assam hnuaia Mizo District chu Union Territory-a hlankai a nih khan Assam Police atanga indangin Mizoram Police chu din a nit a a. Mizoram Police-a IGP hmasa ber Pu J.J. Verma-in office a luah ni 21.01.1972 chu ‘Mizoram Police Raising Day’ atan pawm niin, kumin hi kum 46-na a tling chiah a ni. Mizoram Police hian rambuai leh helna laka mipui venhim hna thawk nghalin, ni 30th June 1986-a remna leh muanna a lo awm atang leh ni 20th Feb 1987-ah Mizoram chu State puitlinga hlankai a nih hnuah Mizoram State chu sakhua leh hnam anga, a bik taka humhalhna dan (Article 371-G of the Indian Constitution) siam a nih atang chuan ‘Mizoram Police Force’ tiin thuam tha chhoh zel a ni a. Tunah chuan Department changtlung tak leh tam ber zinga mi ni tawhin kum 2022 khian Golden Jubillee ropui taka lawm tum a ni bawk.