Tunlai hian Social Media-ah internet kaltlanga sumdawnna lam hawi emaw hamthatna tawktarh a mi bum tum an hluar chho hle a hriat a ni a. Heng online ponzi scheme-ah te hian sum engemaw zah deposit-in member a nih theih a. Member-te hi online task hrang hrang tih tur an lo pe thin eg: website visit, movie download, youtube, games and applications download, Facebook leh twitter thenkhat lo like etc. Heng hna an thawh atang hian member-te hian hlawh an hmu thin. Tin, hei bakah hian member pakhatin member thar (downline) an hmuh in hlawh (commission) an nei ve bawk thin.
Internet kaltlang a social media a sum hmuhna tura in zuar tam tak te hi Online ponzi scheme (internet kaltlanga chiahpuam) a ni ngeia hriat a ni a. Online ponzi scheme te hi Chiahpuam business model nen inang khat reng ni a hriat a ni. Member lo ni tawh ten an income a pun theih nan an downline tur member thar an zawng a. Sum siamna dang mumal tak tarlan tur an nei lova, member thar te deposit hi an chunga awmte sum hmuhna hnar ber nia hriat a ni.
Kum 2013 December khan SpeakAsia Online Limited (SAOL), Singapore Company chu online chiahpuam ang chiah a hna thawkin inbumna nasa tak a thleng tawh a, investor ten sum tam tak an lo chan phah tawh a ni. Kumin March 2017 khan Noida Online Scam an tih mai ah Ablaze Info Solution Pvt Limited din tupa chu a thil neih (assets) vaibelchhe 3,700 hu nena man a ni a, hemi case ah pawh hian a company a investor/member ten sum tam tak an chan bawk a ni. Heng company pahnih te pawh hian an member te facebook, twitter etc like tur leh apps download a sum hlawh theih anih thu an sawi ve ve bawk.
Heng online chiahpuam chungchang-ah hian Economic Offences Wing in hma a la chho zel a, sum tam tak chan theihna a nih avangin hetiang online chiahpuam ang chi atang hian mipuite fimkhur hle turin an ngen a. Member ni mekte pawh nakin lawkah harsatna liantham (legal issue) an la hmachhawn theih avangin online chiahpuam hi bansan vat a him ber a ni.
