Vawiin hian Serchhip District Election Officer, Pi Sangchhin Chinzah chuan a pisaah Press Conference neiin Election Commission of India in Special Drive, 2017 a ruahmanna vawiin atanga kalpui tan a nih thu leh, hmalak chhoh dan tur sawifiahna a nei. 

Pi Sangchhin Chinzah chuan, He Special Drive atan hian vawiin June 1 atanga 30th June thleng chu inbuatsaihna (preparatory work) atana hman a ni ang a. He mi hun chhung hian Election Officer, ERO leh AERO training te, BLO training te, Political Party hote nena thawhho na turte neih fel vek a ni ang a. A taka Drive neih hi 1st July – 31st July 2017 inkarah neih tur a ni ang. He Special Drive hian khua leh tui kum 18-21 inkar, Electoral Roll a hming la chuang lo zawnchhuah leh dahluh chu a tum bul ber a ni a. Chutihrualin siamthat, insawn, Polling Station awmna sawn te leh inpaih ngai paih zawng zawng te pawh thawh nghal vek tur a ni, a ti. Pi Sangchhin Chinzah chuan, Polling Station tinah 8th – 22nd July, 2017 chhung hian Special Camp buatsaih a ni ang a, BLO zawng zawng ten an huam chhungah in tin lut chhuaka hmalakna an nei bawk ang, a ti a. He Special Drive atanga thun thar leh siam that ngai lut zawng zawngte chu August, 2017 thla chhunga chinfel hman vek tum a ni bawk. 

Electoral Roll a hming thun thar, tih danglam ngai ang chi reng reng hi internet online hmanga tih vek theih a ni bawk a, a ngaihven duhte tan nvsp.in ah luh theih a ni. Zawhna leh hriatthiam loh neite tan fee chawi lova phone hmanga zawhfiah theihna Number 03838-226012 a awm a, State Level ah pawh 0389-1950 ah biak theih reng a ni bawk. 

Pi Sangchhin Chinzah chuan, India ram chu mipui rorelna ram a nih ang ngeiin mipuiten ram roreltu tur an thlang thin tur a ni a. Chumi atana thil pawimawh tak chu Electoral Roll a hming dah luh hi a ni. Kan hnathawhna avangte, zirna avangte leh thil dang dang vangin Roll ah hian la chuang lo kan awm thei a, khua leh tui dik takte kokim taka kan chuan ngei theih nan leh mipui rorelna ram humhima a awm zel theih nan theihtawp chhuaha thawktute puibawm turin Chanchinbumite, khawtlang hruaitute, kohhran hruaitute leh mitinte a sawm a ni. 

District Election Officer hi Pu Abraham B. Khithie, Election Officer leh Pu K. Saitluanga, IPRO ten an tawiawm a ni.