Vawiin hian Serchhip Headquarters MZP ten Serchhip District chhunga zirna in atanga HSLC leh HSSLC 2017 Exama Distinction a pass chinte lawmpuina hun DC Conference Hall ah a buatsaih a. Parliamentary Secretary for Education, etc., Pu Joseph Lalhimpuia chu khuallian niin Pu Lawmawma, DEO, Serchhip chu khualzahawm a ni. 

Khuallian Pu Joseph Lalhimpuia chuan, kumina zirlai tithate chawimawina hunah ka tel ta nual a, heng chawimawi tlak kan zirlai naupangte atanga ka hmuh chhuah chu an thawkrimin Pathian an tih em em tih hi a ni. Heti ang mi tam tak kan ramin kan neih avang hian kan hmakhua hi a eng a, nasa takin kan ram hi a thang chho dawn a ni, a ti. Sawrkar chuan zirna lamah nasa takin hma a la a, zirna in leh zirtirtute pawh a a thuam tha nasa a, Syllabus pawh NCERT ruahman ngat hmang in English Medium leh Mizo Medium a zirlaiten text book inang vek an hmang ta a, budget lama hlawh indaih lova awm reng thin pawh kum 2014 atangin tihbo a ni tawh a ni. Chuvang chuan a thawktute lakah pawh sawrkar besei a sanga, a tlin ngang lote chu dim vak kan tum lo a ni, a ti. Khuallian chuan, vawiin zirlai chawimawina dawngte chu a hnu zela chawimawi tlak nih tum tlat tur leh an hnunga mite tana entawn tlak nih tum tlat turin a fuih a, tunlaiah tharum hi chakna nilovin hriatna hi chakna hnar zawk a ni a. Hre tam apiang an dingchanna khawvelah kan cheng ani, a ti. Serchhip khawpui chu zirna thatna hmun, miten an pan ruih ruih tlaka buatsaih zui tum turin zirtirtute, zirlaite, khawtlang hruaitu leh mipuite chu a chah a ni. Khuallian hian zirlai tithate hnenah hian lawmpuina Citation a hlan nghal a ni. 

Khualzahawm Pu Lawmawma, DEO pawhin thusawiin Serchhip District chhunga zirnain hmaa sawn theihna tur sawrkar hmalakna hrang hrangte, hmachhawp la awm te leh thahnem ngaih kan mamawhna lai nia a hriatte a tarlang a ni. 

Vawiina zirlai titha an chawimawite hi an vaiin mi 29 an ni a, Pu Zarzosanga, Serchhip College a thawk, tunhnai maia Doctorate Degree dawng thar hnenah lawmpuina leh Pu Lalduhawma Khiangte, PCR High School zirtirtu hnenah zirtirtu tha chawimawina an hlan bawk. 

MZP Serchhip Headquarters in zirlai tithate an chawimawina hi Laltlanmawia, Finance Secretary in a kaihruaia, T. Biakchamliana President chuan thusawina hun a hmang a. A ni bakah hian Citation sponsor saktu State Bank of India Serchhip Manager, Pu Kishore Singh leh MZP General Headquarters aiawhten thusawina hun an hmang bawk. 

He hun hi Serchhip Bawrhsap Pi Sangchhin Chinzah leh sawrkar official thahnem takin an telpui a ni.