Mizoram Police chuan mipuite leh rampawna hnathawk tura kal tumte hriattirna a hnuaia mi ang hian a chhuah :
Mizoramah a bikin thalaite zingah hna hmulo kan pung zel a. Kan ramah mi zawng zawng tan hna tha thawh tur a awm vek sen loh avangin ram pawnah te hna hrang hrang thawk turin kan thalaite an chhuak nasa a. Hei hi thil lawmawm leh ram economy tan pawh a tha viau tura ngaih a nih rualin Dan ang thlapa Mizoram chhuahsan ramdanga hnathawk kan awm mang lo tlat a ni. Heng mite hian an hnathawhna ramah harsatna an tawhin Dan anga inpuih a har phah thin. A bik takin tunlai hian Foreign (Singapore, Macau etc.) lama hnathawk/inhlawh tura kal tumten Myanmar lam atanga kalin Myanmar khawpui Yangon an thlen chuan an agent ten document lem hmangin Myanmar passport an lo siam sak thin a. Myanmar khua leh tui angin ramdangah hnathawkin an kal ta thin a ni. Hetianga hnathawk tura kalchhuah hi a him lo hle a, Dan kalh a ni bawk. Myanmar kaltlanga ramdanga hnathawk tura kal hi awlsam zawk angin lang mahse a him loh dan chu hetiang hi a ni.
1. Mizoramah hian dan ang thlapa in-register placement agent an la awm lo a. Agent inti hetianga rampawna hnathawk tura thawnchhuah tur zawng leh sawm thin an awm a, anni hian thiam taka hna tha leh itawm tak angte a sawi hmuhin chinchang hre lo zawk, a bik takin hmeichhe tleirawlte an target duh thin. Heng ang mi ho lakah hian kan fimkhur a ngai hle a ni. Tin, a then phei chuan nu leh pate phalna la mumal lova sawmchhuah (bumchhuah) te pawh an awm. Nu leh pate phalna la an nih pawhin, chutiang nu leh pate chuan a him tawk lohzia an hre lo fo thin.
2. Agent-te hian a tirah ramdanga hnathawk tura mi an sawmchhuah laiin engkim (transportation, food and lodging) an free sak vekin lang mahse an mi thawnchhuahten ramdanga hna an thawh hnuah service charge atan an thla ruk (6) hlawh an laksak thin a ni. India Dan hnuaiah erawh chutiang chu phal a ni lova, agent ten service charge an la a nih pawhin an lak theih tam ber chu an ni 45 hlawh emaw a tam berah cheng sing hnih (20,000) bak service charge atan an la thei lo a ni.
3. An han awmna / hnathawhna chu an lo suangtuah lawk ang leh rin ang a lo nih leh si loh chuan harsatna an tawk a, an tum lawk leh hriat loh karin mipat hmeichhiatnaahte humsual an lo dai phah thei bawk a ni.
4. Nawmsip bawlna hmun a tam avangin mi chi hrang hrang fuankhawm an ni a, ruihtheihthil a tam a, nawhchizawrhna hmunpui a tam bawk a, hengte hian kan thalaite foreign-a hnathawkte nun a ti chhe thei a ni.
5. An hnathawh tur hi a hmun an thlen hma chuan engmah a chiang ngai lova, an thlen hunah agent ten thawk tura an tihna hmunah an thawh a ngai thin a. An hnathawh duh loh pawh nise loh theih lova an thawh a ngai thin a ni. Thenkhat chu mi ina awmte pawh an awmnate an sual viau chuan zalen lo tak leh hrehawm takin an awm phah theih bawk a ni.
6. Harsatna hrang hrang, thihna hial pawh thleng thei a ni a, chutiang hunah chuan an ruang pawh Mizoramah pawh thawn luh theih a ni tawh lo, Myanmar khua leh tui anga kal an nih tawh tlat avangin.
7. Chuvang chuan,rampawnah hna kan thawk dawn a nih pawhin Indian passport hmang ngeia, Danin a phut anga ramdanga hnathawh hi a him ber a ni.
8. Tunlaiin Kuwait-a thawk tura Nurse-te hnalak chungchangah Media lama advertisement lem tihdarh niin a employer-te hming chu Ministry of Health, Kuwait & Kuwait Oil Compnay anga lantir a ni a. He advertisement hi a tak tak ni lovin thil diklo hul hual a ni a, hemi chungchangah hian mipuite fimkhur turin kan inngen a ni.
