MZP Headquarters, Saitual buatsaih HSLC, HSSLC leh College zirlai tihthate lawmpuina hun Govt. Saitual College Silver Jubilee Hall-a neih chu vawiin khan Home Minister leh bialtu MLA nibawk Pu R.Lalzirliana chuan khuallian niin a hmanpui.

Pu R. Lalzirliana chuan ram leh hnam humhalhna tha ber chu thiamna hi a ni tiin zirlaite chu nakin lawka kan state sawrkar hnathawk lian tak tak te hnamdang an nih mai loh nan theihtawp chhuah turin a chah a. Mizoram mai bakah Central sawrkar hnuaia hna awm angte pawh thawk thei tura zirlaite chu fuihin Mizoram pawna chhuah hreh lo tur leh ram leh hnam vawrhlara hma sukawtu nih tum theuh turin a sawm nghal bawk a ni. Thalaite hmakhua ngaiin sawrkarin Mizoram Youth Commission (MYC) kaltlangin trainingna tha leh hna a hmuhsak nual tawh a ni tiin hlawhtlinna chang tur chuan nawmsak hmasak lovin thawhrim,taihmak, tumruhna leh chhelna neih angai a ni, a ti a. Home Minister chuan zirlai pass tharte chu an taihmak rah anih thu sawiin tuna hlawhtlinna hi a bul tanna chauh a ni a, inthlahdah mai lovin khawvel inelna sang zawka tel pha ve ngei turin tan inla sauh sauh tur a ni, a ti a. Bialtu MLA chuan a bial chhunga sawrkar hmalaknate a tarlanga; heng zingah hian cheng nuai 350 vel senna tur Multi Shopping Centre sak mekte, Khanpui leh Tualbung pawh tur kawngpui cheng vaibelchhe 20 senna tur pawh tan thuai anih tur thute leh bial chhunga VC area tinte hmantur computer leh hmanraw dangte pawh pek tura ruahman a ni a ti bawk. Pu R.Lalzirliana chuan zu chungchang zirchiang tur Expert Member 7 awmna din a ni a, an zirchianna atanga thurawnte sawrkar chuan a ngaithla dawn a ni a ti.

He hunah hian MZP Hqtrs. Saitual ten zirlai titha Mizoram puma top ten-a langpha chinte lawmpuina hlan a ni a. Top ten a langpha te chu:

1. Lalhriatpuia Ralte ( Dept of Geography, Top 5) Govt. Saitual College

2. Benjamin Lalbiakmawia (Dept of Environmental Science, Top 6) PUC

3. VL Rempuii Sailo (Dept of Geography, Top 7) Govt. Saitual College

4. Lalbiaksanga (HSSLC Commerce, Top 9) St Joseph Higher Secondary School te an ni a.

MZP Hqtrs, Saitual huamchhunga High School result tha ber Presbeteryan English School, Keifang leh Higher Secondary School result tha ber Govt. Saitual Higher Secondary School te hnenah lawmpuina hlan a ni a. Hengte bakah hian zirlai first division leh distinction-a pass te hnenah lawmpuina hlan a ni bawk.

He programme hi MZP Hqtrs, Saitual President Pu F. Lalnuntluanga’n a kaihruai a. Kalkhawmte lawmna thu Pu PC Lalthansanga, Vice President in a sawi a. Report Pu Lalchhandama, Secretary hnen atanga ngaihthlak a ni a. Thusawi tawi Dr. Siamhnuna, Principal, Govt. Saitual College leh Pu L.Ramdinliana Renthlei, Secretary, MZP General Hqtrs, Aizawl hnen atanga ngaihthlak a ni bawk.

Zirlai tithate lawmpuina hunah hian Pu R. Vanlalsawma, SDO(C) Saitual; Pu Lalsikula, SDEO, Saitual; Pu Lalchhanhima, BDO Thingsulthliah te pawh an tel a ni.

Attachment

  • Loading attachment...