Tunhnai kum 4-5 vel atang khan mahni bank account ngei, sum leh pai it vanga midang hnena hralh thin an awm tih hriat a ni a. Heng Bank account leh ATM Card hralh takte hi mi sual kutah lutin sual tih nan (Cyber Crime) leh pawi khawih nan hman thin niin mi tam tak bumin an sum ei sak nan hman thin a ni a. Heng misualte hian bank official leh Income Tax hnathawk anga in sawi thinin, online shopping kaltlangte, thilpek tha tak (gift) pek leh lottery/vanneihna chi hrang hrang tawktarhin mi an bum thin a. An mi bum hnenah chuan pawisa thawnna tur account hrilhin, chumi atan chuan an bank account lei khawl chu an hmang thin a ni.
Tunhnai khan Aizawl-a college zirlai pakhat chuan sum awlsam it vangin bank hrang hrang paruk (6)-ah account hawngin, sum hlawh nan mi bum hmangte hnenah a hralh a. Heng misualte hian online shopping kaltlanga mi bum nan chu bank account chu an lo hmansak a. Heng misualte hian he college zirlai hming hian email account-te siamin an bank account hralh takte nen chuan cyber crime tihna hmanruaah an nihna thupin an hmang ta a. Misualte hming leh nihna engmah a lang tawh lova, account neitu hming chiah a lan tawh avangin inbumna a tel ve miahlo college zirlai chu inbumna a tel ve a ngaih niin, inbumna case a neih phah ta a ni.
He thil thalo tak hi a reh theihna turin leh mipui kan fimkhur theih zawk nan heng a hnuaia tarlante hi ngai pawimawh theuh ang u:
1) Bank account hi hralh phal a ni lova, dan bawhchhiatna a ni. Hralh luite chu dan hmanga hrem theih an ni.
2) Bank account I hralh anih chuan I nihna (identity) I hralh tel nghal tih hria la, I account hralh chu thil sual tih nan hman anih chuan I chungah dan anga action lak theih a ni.
3) Sum it vanga bank account I hralh anih chuan a hnuah harsatna lian zawk I hmachhawn thei a ni tih hria ang che.
4) Bank account hawn nan document lem (fake) I siam/hmang anih chuan dan anga hrem theih I ni.
5) Hetiang sualna (Cyber Crime) chungchanga thu hriat chian duh nei emaw information pek duh emaw kan neih chuan S.P CID (Crime) Mizoram Ph-0389-2334082 ah hriattir tur a ni.
