Lunglei Zobawk field bul leimin chu vawiin khan Parliamentary Secretary Pu Joseph Lalhimpuia'n a hmunah tlawhin Geology and Mineral Resources mithiamte nen lei min belh zel ven dan tur an zir chiang.

Geologists ten an hmuh danin Zobawk field bulah hian lung kara khi engemawzat a awm a. Heng khi karah hian tui a luh thin bakah a lung a no avangin lei (soil) u awrh chauh a ni a, tuia chiah rei deuh chuan zawp mai thei niin ruahtui leh tui pipe atanga tui luangchhuakin a chiah huh rei deuh avanga min niin an hmu a. Ruah tui a hlawma a buak loh nan tuidawn (rain gutter) leh tui tling lova a luan ral zung zung theih nan tuihawk luan kawr lian zawk siam a tul thu mithiamte chuan an sawi. Zobawk lei minna tlangah hian PHE tanky pathum, primary school, transformer leh YMA run bakah in engemawzat a ding a ni.

Pu Joseph Lalhimpuia hi Geology and Mineral Resources Director Pu Lalhmachhuana, Senior Geologist Pu P Sanghnuna, Lunglei BDO Dr Malsawmtluanga Fanchun, Lunglei IPRO Pi C Lalremruati te bakah khawtlang hruaituten an tawiawm a ni.