Vawiin chawhma ah khan Mizoram Police Officers 11, NEPA a training zo tawh tuna probation a dah mek te leh an mahni hruaitu Pu C. Laldina, DIG te chuan Raj Bhavan ah Mizoram Governor Lt.Gen(Rtd) Nirbhay Sharma an kawm a.

MPS Probationers te hnenah Governor Lt.Gen(Rtd) Nirbhay Sharma chuan khawvel hmasawn zel ah leh hun lo inher danglam zelah Police mawhphurhna te pawh bihchian a hun tawh thu a hriat thu leh mipui tana zau zawka hna thawh dan te a awm em tih zirchian a ngai a ti a. Law & Order chungchang bakah Mizoram mipui rilru sukthlek dan te, ei leh bar a mipui nawlpui dinhmun leh vantlang boruak inlumlet dan te pawh police ten an zirchian a tul thu a sawi a. Dikna, remna leh muanna a awm theih nan theihtawp chhuah zel chungin an hnathawhna ah dan bawhchhia an man zingah aia upa zawk leh nunau te an awm a nih chuan hawihhawmna nen dawngsawng turin a chah a. Police Uniform in zahawmna leh thuneihna a ken tel chu fimkhur taka hmang tur leh ti bawrhbang lo turin a chah bawk a ni. Mi chi hrang hrang nena indawr an nih avang in police ten Mizo tawng piah lamah tawng an dang thiam tam a ngai a ni a ti a. Police te chu sawrkar hmel langsar tak an nih vangin an nun an uluk zual bik a ngai a, mi dang te entawn tlak ‘role model’ nih an tum tur a ni a ti.