No.1249/2020-2020

Aizawl, the 20th May 2020 : IGP (Hqrs.) Mizoram Police leh Chief Public Relations Officer (CPRO) Mizoram Police Media Cell chuan a hnuai ami angin Press Statement a siam.

Dt. 17.5.2020 ((Sunday) khan social media platform facebook-ah mi pakhatin mipui tichiai thei thu, 'Nimin piah maia lo hawho kha sawrkar hian an hming/veng/phone no. an nei kim lo nge, kan thianten kawnglaka put ru an awm an tih hi a dik em? a hmun chu sawi lo ila a lo humtu hming thlengin an sawi thei tlat' tih thu Facebook group khat 'ZORAM POLITICS GROUP 1'-ah a post a. He thu hian mipui tam tak a tichiai a. A post screenshot (thlalak) pawh whatsapp group hrang hrangah a darh nghe nghe a ni.

He thu hi chhui nghal a ni a. A post-tu mi pakhat, kum 42 mi, Sairang Vengsanga mi chu thu zawh fiah niin midang titi a hriat atanga he thu hi facebook group pakhata post a nih thu a sawi a, thudik a nih leh nih loh pawh a chian bik loh thu a sawi bawk. Community Quarantine Facility emaw Home Quarantine tura lakte an hriat sual vang a nih a rin thu a sawi bawk.

State pawn atanga Mizorama lo hawte hi Govt. Quarantine Facility-ah lut hmasain phalna neite chu Community Quarantine Facility-ah emaw Home Quarantine turin an kal leh thin. Hetianga thudik lo leh mi rilru tichiai thei a post avang hian a post-tu lakah hian thubuai ziahluh a ni a. Chief Judicial Magistrate, Aizawl hnenah cognizance lak a nih hnuah Bawngkawn Police Station Case No. 147/2020 Dt. 19.5.2020 u/s 505(1)(b) IPC r/w 54 DM Act register niin thudik lo post-tu hi man a, judicial custody-a thawn tura hmalak mek a ni.
A dik lo zawnga mipui rilru hruai thei leh mipui tichiai a, thu dik tluantling lo leh thu belhchian dawl lo thehdarh hian nghawng tha lo tak a nei thei a, mipuite i fimkhur tlang theuh ang u.