Vawiin khan Mizoram Police Raising Day 2020 Lawmna chu G.S Arya Mess, PHQ kawtah hman a ni a, Home Minister Pu Lalchamliana chu Khuallian a ni.

Mizoram Police hi Ni 21, January, 1972 ah Mizo District a nih laia din tan a ni a, a tirah chuan Aizawl Police Headquarters hnuaiah Unit 4- Aizawl DEF, Lunglei DEF, Chhimtuipui DEF, CID (SB) a awm a. Armed Battallion neih a ni nghal lo a, District SP hnuaiah District Armed Branch a awm thung a ni. Police Station pawh 6 chauh a tirah awmin, mi 200 vel thawktu an awm a.

Tun dinhmunah hian Range 3 awmin, District 11 ah SP Rank Officer in dah a ni a, Police Station 40, Special Police Station 3 (Cyber Crime, Special Narcotic leh All Women Police Station), Police Outpost 16, Armed Police Battalions 8, Battalion Border Outpost 23, Police Training School 1 leh SP Rank Officer enkawlna hnuaiah Unit dang 5 a awm bawk a ni. Mizoram Police Sanctioned Strength 12292 a ni a, Actual Strength 9006 (73.27%) niin, Vacancy awmzat 3286 (26.73%)a ni.

Mizoram Police te hian ralthuam, inbiak pawhna changkang, invenhimna tha tak tak an nei bakah Cyber-Forensic Laboratory cum Training Centre, Canine Squad te pawh CID (Crime) hnuaiah neih a ni bawk a ni. Vawiin thlenga ram tana nunna chan hi mi 56 an awm a, thawk tha leh police medal dawng 341 an awm a, chung zingah chuan President's Police Medal for Gallantry 10, Police Medal for Gallantry 26, President's Police Medal for Distinguished Service 21, Police Medal for Meritorious Service 155, Governor's Gold Medal 115 leh Governor's Silver Medal 16 an ni. State, National leh International Level Sports Competition hrang hrangah Mizoram Police te hian Medal tam tak an dawng tawh bawk a ni.

Home Department buatsaihin Mizoram hmun hrang hrangah Blood Donation Camp neih a ni a, Mizoram Police te hian thisen Unit 274 chuang an pe tawh a ni. Mizoram Police Raising Day lawmna denchhen hian inelna hrang hrang- Zai, Painting, Football, Shooting buatsaih a nih bakah, Cultural Programme leh ralthuam hrang hrang phochhuahna hun buatsaih a ni bawk a. Heng bakah hian Seminar pawimawh tak "Drug Trafficking and Abuse in Mizoram: Way Forward" buatsaih a ni a, he seminar ah hian mithiam a bika sawm niin, Mizoram tana rohlu tur seminar denchhena lehkhabu publication siam tum a ni bawk a ni.

Mizoram Police te'n sawrkar zarah thahnem ngai takin hmalakna hrang hrang an nei meka, chung zingah chuan tih hlawhtling tam tak a awm a, chungte chu- Training Facilities thar, Special Training Funds, In-service Course thar, Community Outreach Programes, All Women Police Station, CCTV Surveillance System (Aizawl leh Lunglei), Tourist Police, Mizoram Safety Application leh Online ILP te a tel a ni.

Home Minister Pu Lalchamliana hian Mizoram Police Raising Day denchhenin Beat Patrolling System a hawng a, Mizoram Annual Report, 2019 pawh a tlangzarh nghal a ni. Home Minister hian Kum khat chhunga Police Station ti tha zual pathum- Champhai Police Station, Lawngtlai Police Station, Khawzawl Police Station te hnenah lawmpuina leh pawisa fai a hlan nghal bawk a ni.

Mizoram Police Raising Day 2020 Lawmna hi Pu John Neihlaia, IGP (Hqrs.) in kaihruaiin, kalkawm te a lo lawm a ni. Pu SBK Singh, DGP pawhin thu sawiin Glimpse of Mizoram Police Raising Day-2020 Celebration Video Clip en ho a ni a, 3rd Bn. MAP ten Band Display an nei bawk a ni. Pu L.H. Shanliana, IGP (L&O) chuan lawmthu sawiin he hun hi a khar a ni.

Attachment

  • Loading attachment...