Vawiin khan Aizawl SP Conference Hall ah Criminal Tracking Network & System (CCTNS) Go Live & Citizen Portal chungchangah Mizoram Police te chuan Press Conference an nei a, Pu LH Shanliana, IPS, IGP (Intelligence & Law and Order) in he hun hi kaihruaiin chanchinbumite nen inkawm hona hun an hmang.

Pu LH Shanliana chuan Criminal Tracking Network & System (CCTNS) hi Mizoram mipuiten tangkai taka an hman theihna tur chuan an hmelhriat hmasak angai a, an hmelhriat theihna tur awlsam ber chu chanchinbumite kaltlang hian a ni, a ti a, CCTNS hi Mizoram Police leh mizo mipuite inkungkaihna ti nghet tu a nih ngei ka beisei, a ti bawk.

Pu Zosangliana, SP CID Crime chuan Citizen Portal hman dan te sawifiah in,  CCTNS enkawl tur hian Mizoram Police engemawzah hnenah zirtirna pek an nih tawh thu a sawi bawk. He Press Conference ah hian Pu Joseph Lalchhuana, IPS, DIG (Trg), Pu Lalbiaktluanga Khiangte, IPS, DIG (Northern Range), Pu Neigchungnunga, IPS, DIG (CID), Pu C Lalzahngoa, SP Aizawl, Pu PC Lallianthanga, SP, Wireless leh Police Officer engemawzahin an telpui bawk. Mizoram Police chuan a hnuai ami ang hian CCTNS Go-Live & Citizen Portal chungchangah Press statement an chhuah;

Crime and Criminal Tracking Network and System (CCTNS) hi National E-Governance Plan (NeGP) hnuaia Mission Mode Project pakhat a ni a. He project in a tum ber chu Police Station hna hrang hrangte Information Technology hmanga tih changtlun a ni. Mizoram CCTNS hi kum 2010 atanga tan niin, Police Station 39 leh Higher Office 52 te network hmangin thlunzawm an ni a, hnathawh nan Core Application Software (CAS) Police Station tinah dah a ni bawk. India ram chhungah hian Police Station 15,268 chuang zet a awma, he project hmang hian heng Police Station te hi thlunzawm vek tura hmalak a ni.

Mizoram sawrkar pawhin CCTNS project pawimawhna hriain chak takin hma ala mek zel a ni. He project ah hian Committee hrang hrang State level leh Department level ah din a ni a, Chief Secretary Mizoram hi State Apex Committee chairman niin Pu Balajt Srivastava, IPS, DGP Mizoram hi State Empowered Committee chairman a ni. CCTNS Project a State Nodal Officer atan Pu L.H Shanliana, IPS, 1GP (Intelligence & Law and Order) ruat niin Pu Zosangliana, MPS, SP CID Crime hi Deputy Nodal Officer a ni bawk. District SP zawng zawngte District Mission Team leader anni bawk.

He software hmang hian a hma a lehkha hmanga hna an lo thawh thinna chu computer hmangin an thawk vek thei dawn a ni. He software hmang hian State Data Centre ah Police Station hrang hranga an entry te lak khawm leh vek a ni a awlsam takin an entry te chu a zawn chhuah zung zung theih bawk. State Data Centre a dahkhawm an nih hnu in, National Data Centre, Delhi ah record te chu dahthat leh vek an ni bawk. Misual chhui kawngah te, rang tak a file zawnchhuah te, case hrang hrang thlunzawm dan kawngah te he project hian nasa takin Police Department chu a pui chho zel a ni.

CCTNS Project hi Police tan mai nilo, mipui te in Police hnathawh an lo tangkaipuia, awlsam taka an dawn theihna a ni a. Internet kal tlang in Citizen Portal wvvvv.cctns.mizoram.gov.in/citizen, Firefox leh Internet explorer browser hmangin mahni in register hnuah a hnuaia tarlante hi a hman tangkai theih dawn a ni:

Employee/Tenant Verification dilna

Character Certificate dilna

Domestic Help Request

Complaint thehluhna

Viewing of FIR

Passport verification,etc

He project hi network a inthlun zawm anih avang in connectivity ah hian hartsatna kan tawk nasa hle a. Chu harsatna su kiang tur chuan Police Department hian hma a la chho mek zel a. CCTNS Project atan bik liau liau Wide Area Network connectivity hi Mizoram pumah siam tura hmalak mek ani. Hemi chawm tur hian NIC kal tlangin high speed internet lak a ni bawk. India zalenna champha 71 na (15/08/2018) ah hian Pu Balaji Srivastava, IPS, DGP Mizoram chuan Aizawl khawpui chunga Police Stations 4(pali) te Aizawl Police Station, Kulikawn Police Station, Bawngkawn Police Station leh Vaivakawn Police Station huam chhunga hman theih turin a hawng. Mizoram pum huap Go-Live tur hian hmalak mek zel ani bawk.

CCTNS Project hi chak leh zuala hmasawn tur hian hmalakna kalpui zel a ni bawk. Police Station hna hi paper-less (lehkha ziak ngailo a computer hmang) a hna thawh theihna hmuna siam ngei tumin Police Department chuan hma a la zel a ni. Mizoram state a Law and Order kenkawhna kawngah leh sual hnu chhuina kawng atan he project hi rahbi pawimawh tak a ni a. Mizoram Police leh mipuiten tangkai taka an hman kan beisei tlat a ni.