West Bengal-a Election Duty-a kal Mizoram Police-te chuan Kolasib-a Mother Teresa sisterte rawngbawlna ṭanpui na'n pawisa an pe.

Ṭanpuina petute hi Manipur leh West Bengal-a election duty-a kal, 1st Bn MAP hnuaia B Company mi leh sate an ni a, election duty zova an rawn haw pahin vawiin chawhnu khan Diakkawn, Kolasib-ah ṭanpuina hi an pe a ni. 

B Company hnuaia Police mi 75 te thawhlawm tlingkhawm Rs. 29100 chu Mother Teresa sisterte aiawhin Sr. Melodia Mantawni’n a dawng a, Kolasib-a Catholic Kohhran hruaitute'n sisterte hi an ṭawiawm a ni.

Election Duty-a West Bengal-a thla khat chuang an cham chhungin B Company hian Kristian Missionary-te rawngbawlna hmun hnihah ṭanpuina an lo hlan tawh nghe nghe a ni.

‘Mother Teresa Pawl’ tia hriat lar, Missionaries of Charity sisterte hi khawvel pumah inzarpharhin mi rethei, damlo, hnuchham leh ṭanpui ngaita ṭanpuia rawng bawl ṭhin an ni a. Mizorama an rawngbawlna hmun neih chhun chu Kolasib hi niin hetah hian kum 1987 aṭang khan rawng an bawl ṭan a ni.

Attachment

  • Loading attachment...