Tukin dar 8:30 khan Aizawl Treasury Square a Mizoram State Cooperative Marketing & Consumers’ Federation (MIZOFED) Ltd. Petrol dispensing pump chu a mamawhtu apiangin darkar 24 chhunga an dawr theih turin Cooperation Minister Pu C. Lalrinsanga’n a hawng.

Pu C. Lalrinsanga chuan MIZOFED a thawktute tanlakna leh inpekna zarah Aizawl dispensing pump mipuite dawr theih tura darkar 24 hawn ani ta chu lawmawm a tih thu a sawi a, rikrum thil leh mamawh thut thilah mipuite mamawhna phuhru tura hetianga ruahmanna awm hi mipui leh ram rawngbawl duhna tak tak thinlung neitute vang ani a ti a. A mamawhtuten engtiklaim pawha MIZOFED an biakpawh theihna tur Toll Free Telephone dah turin hma lak mek anih thu a sawi bawk. Petrol leh diesel thianghlim kan dawn theih ngei nan mipuite pawhin kan bengvar kan chhuah ve fo a ngaia, chutih rualin Legal Metrology lam pawhin petrol leh diesel thianghlim kan hman theihna turin theihtawpchhuah zel se, an hmalakna te leh petrol thianghlim pekchhuah anih leh nihloh te mipuiten an hriat zung zung theihnan ruahmanna siam thin se a duh thu a sawi a, print leh electronic media te pawh tanlakpui turin a sawm nghal bawk a ni.

Minister chuan MIZOFED a thawktu, abikin dispensing pump a duty te chu an hnathawhna ah rinawm leh thahnemngaia, hawihhawmna nen anmahni dawrtute dawngsawng thin turin a chah a, petrol leh diesel te a tling ngei mipuite hnenah pe thin turin a chah bawk a ni.

Mizoram State Cooperative Marketing & Consumers’ Federation (MIZOFED) Ltd. hi State level Co-operative Society leh State Government Agency niin kum 1981 ah din a ni a, Aizawl Retail Outlet hi kum 1981 December ni 9 atangin MIZOFED hian a enkawl tan a, mipui tana ding anih ang ngeiin kum 37 chuang  chawl lova mipuite mamawh tuialhthei chawlutin a hralhchhuak mek a ni.

MIZOFED hnuaiah hian tun dunhmunah Mizoram pumah petrol/diesel dispensing pump pariat – Aizawl, Champhai, Kolasib, Lunglei, Lawngtlai, Vairengte, Hnahthial leh Thenzawl - a awm a, Thenzawl hi Bharat Petroleum Corporation Limited (BPCL) hnuaiah awmin a dang zawng hi Indian oil Corporation Ltd (IOCL) hnuaiah an awm a, tunah hian BPCL hnuaiah New Capital Complex, Aizawl leh Kawnpuiah dispensing pump thar hawn tum mek a ni.

Vairengte dispensing pump hi kum kalta ah khan darkar 24 chhung hawn tan ani tawh a, Lunglei dispensing pump hi kumin May ni 31 khan darkar 24 chhung atan hawn ani veleh a, tunah hian MIZOFED petrol dispensing pump zawng zawng darkar 24 chhunga hawn tura ruahmanna kalpui mek a ni.

Aizawl Retail Outlet ah hian Petrol chihnih Motor Spirit (MS) leh Xtra Premium (XP) bakah High Speed Diesel (HSD) hralhchhuah a ni a, kum 2018-2019 financial year chhungin Petrol (MS) 2404000 litres hralhchhuah niin Petrol (XP) 708000 litres hralhchhuah a ni a, High Speed Diesel (HSD) 1264000 litres hralhchhuah ani bawk. Heng petrol leh diesel an hralhchhuah atang hian sawrkarah sales tax Rs. 411,28,848/- an chhunglut a, hlep Rs. 97,37,594/- an nei bawk a ni.

MIZOFED, Aizawl hi Thawhtanni atanga Inrinni thleng darkar 24 hawn ani ang a, pathianni ah erawh chuan chhun dar 12:00 tanga tlai dar 3:00 thleng hawn ani thung ang.