FCS&CA, LAD, Fisheries etc Minister Pu K Lalrinliana chuan Kolasib Headquarters MZP buatsaih Kolasib district huam chhunga Mizo Zirlai titha te chawimawina hun chu vawiin khan St.Joseph Parish Hall ah a hmanpui.

Khuallian chuan zirlai titha te leh an mahni tawiawmtu an chhungte chu lawmpuina chibai bukin tunlai khawvel kan tawn meka zirin kan lehkha zirchhan ah kan chian angai ani a ti. Zirlai nun ah chuan Pathian dah pawimawh hmasa berin thawhrimna leh awmze neia zirna kawng zawh in a zui a ngai ani tiin mithiam hmasa te leh kan Pi leh Pu ten an lo hmuchhuah tawh chu tunlai khawvela kan mamawh dana zirin lo her remin hlawk zawka kan hman tangkai angai ani a ti. Ram leh Hnam intodelhna kawnga zirlai hman tangkai a pawimawh thu sawiin Ram ngaw, tui hna leh nungcha te humhalh zawnga tan kan lak a hun tawh ani tiin intodelhna rilru pu in thil chi hrang hrang dehchhuah/tharchhuah na kawngah hma kan sawn a hun a ni ati.

Minister chuan Mizoram ah zirna hmun tha zawk te a awm chhoh zel thu tarlangin heng hmunah te hian mahni tui na zawng line te a zir theih a, Kolasib ah ngei pawh thalaiten hna zawnna kawnga pui thei tu tura an mamawh MYC kaltlanga Coaching Centre din tura hmalak mek a nih thu a tarlang bawk.  Kolasib District thalaite chuan District dang thalaite angin theihna an nei ve ani tih hria a, mahni zirlai chu nunpui a pawimawh ani a ti a, kan Ram in enge a mamawh, Ram tan enge ka thawhchhuah ve theih ang tih ngaituahna te sengin Mizoram tana mi tangkai nih tum in a tha zawnga intlansiak turin zirlai kalkhawm te chu a fuih a ni.

MZP general headquarters President L Ramdinliana Renthlei pawhin thu sawiin  lehkha zirlai chuan a tawk chauh a khawtlang leh kohhran ah te pawh inhman thiam a ngai ani a ti a, lehkha zir puitlin hnu ah ram leh khawtlang chuan min la chhawr tangkai dawn chauh ani a ti a, Pu Zomuanpuia Chhakchhuak, Adivser Kolasib Hqrs MZP chuan zirna kawngah Kolasib District thalaite chu tan lak a hun takzet ani tiin , Kolasib District a Blind Students te chu facilities nei tha bik hauh lovin Distiction leh 1st Division a pass thei an awm a hei hi khawh hmuh lama harsatna neilo zirlai te tan chona ni se a duh thu sawi bawkin Mizo tlawmngaihna leh aia upa zah na te chhawm nung reng turin zirlai kalkhawm te a chah bawk a ni.

Mizo Zirlai titha chawimawina hunah hian zirlai kum (Academmic Year) liam ta a, Kolasib District atanga zirlai titha zual engemaw zat chawimawi an ni.