Mizoram Police chuan ni 29th February, 2020 (Inrinni) khan a hnuaia mi ang hian thuchhuah a siam :

1. Dt. 29.2.2020, dar 4:00 AM khan Truck, Registration No. MZ 01/S-4548 (Tata Truck) Kolasib lam atanga Silchar lam pan chu Police Check Gate, Vairengte-ah endik a ni a, he motor check a nih lai hian driver khawsazia chu rinhlelh niin uluk lehzuala check a ni. A hmuna Police duty ten theihtawp chhuaha an han check chuan Motor chhuatah, chhuat siamchawp hi hawna enfiah niin Methamphetamine nia rinhleh, mum nuai 39 hmuh a ni ta a ni. Heng Methamphetamine-te hi uluk taka polythene 390-a pack a ni a, a vaia a rih zawng hi Kg.429 a ni. He damdawi, ruihhlo ni ngeia rinhlelh hi international rate anga mum khat Rs.250/- zela chhutin Rs.97,50,00,000/- (nuai sangkua zasarih sawmnga) man a ni.

Vairengte Police-ten uluk tak leh fing thiam taka an duty an tih avangin ruihhlo tam tham tak hi man a ni. Motor khalhtu Lalramnunmawia (30) s/o H.Vanlalhluna, Zokhawthar lakah Vairengte PS Case No.15/2020 Dt.29.2.2020 U/S 22(c)/25 ND&PS Act ziah luh nghal niin uluk taka chhui chhoh nghal a ni.

2. Dt.28.2.2020-a West Lungdar VC leh All NGOte thuchhuahah kan Home Minister Pu Lalchamliana’n Assembly House-a West Lungdar naupang rukbo tum chungchanga Statement a siam rinthiam har an tih thu leh an hriatthiam mai loh thu tarlan a ni a. Hemi chungchang hi Mizoram Police ten uluk taka chhui chho zelin hetiang hi thil awmdan a ni :

Dt.11.2.2020 khan heng kut tuar pathum zinga pakhat, Rahul Choudhury (27) s/o Sunil Choudhury, Meerut District, U.P. leh a thiante pahnih- Phulkan leh Ahata (Dt.25.2.2020-a kut tuar zinga mi ni lo) hi Maruti Eco Van AS 11R-5297 hmangin Vairengte Police check gate-ah dar 12:08 p.m. ah an lo lut a. Kut tuar dang pahnih - Raju (38) s/o Jamal Uddin, Meerut District, U.P. leh Suzi Hussain Mazumdar (21) s/o Sunohar Ali Mazumdar, Silchar, Assam te hi Dt.14.1.2020-ah Bolero (Dum) AS 11D-7533 hmangin dar 11:25 a.m. ah Vairengte check gate an lo paltlang ve leh a. Anni ho hi Dt.17.2.2020-ah Siaha bul Zero Point Tourist Lodge-ah inhmuin zan khat an riahho hnuah Dt.18.2.2020 kha Lunglei-a Highway Restaurant-ah an riak leh a. Dt.19.2.2020-ah Hotel Leela, Thuampui-ah riakin, a tuk ni Dt.20.2.2020-ah Silchar lam panin an chhuak leh ta a ni. An kalna leh an riahna zawng zawngte chhuichhuah vek tawh niin an riahna Hotel/Lodge neitute pawh biak pawh vek an ni. Tin, Dt.20.2.2020-a Silchar lam pana an kal laia an motor chhia siam that saktu leh lo mikhual a, chaw lo eitirtu pawh biak pawh a, finfiah vek a ni. Tichuan, Dt.24.2.2020 khan Rahul, Raju leh Siju te hi Silchar atangin Mizoram an lo lut leh a, Vairengte Police check gate-ah dar 11:27 a.m. ah an in-report a, Temporary ILP pawh la nghalin, tlai dar 4:45 p.m. ah Hotel Leela, Thuampui, Aizawl an lo thleng leh a ni.

West Lungdar VC leh NGO ten thuchhuah an siam a, Home Minister Statement dikhlel anga an sawi hi thilhriat chian loh vang niin a lang. W.Lungdar-a thil thleng avang hian case pawh hmun hnihah ziah luh a ni a, investigation pawh ngawrh taka kalpui zel a ni.