No.4268/2021-2022

Aizawl the 15th March, 2022 : Dt. 11.3.2022 khan Facebook group pakhat, “ZORAM POLITICS GROUP 1”-ah ‘Thingtlang Pa’ tia indahin mi thiam panga(5) intelkhawmin pawl pakhat, “Ram Siamthatu Pawl”, ram tana mi hnawksak nia an hriatte dahthatu tur pawl an din thu a post a. He post-ah hian Mizoram Chief Minister Pu Zoramthanga leh mi dang thenkhat chungchang sawiin, thla thum(3) chhunga a nihna a bansan loh chuan Chief Minster hi dahthat a nih tur thu leh amah thattu tur tualthattu/sniper pawh inruat fel vek a nih tawh thu a sawi a. A postna account hi fake account a nih avangin leh ram dang atanga enkawl a nih avangin CID te pawhin an chhui chhuah theih loh tur thu a sawi tel bawk a ni.

He thil hi Cyber Crime Police Station chuan chhui zui nghalin dan kalha hel tura infuihpawrhna, inrikrapna leh inphiarrukna thil a nih avangin Enquiry Officer-in FIR thehlut nghalin, Cyber Crime PS Case No. 42/2022 Dt. 12.3.2022 u/s 120B/124A/506(b)507 IPC ziah luh nghal a ni. Mizoram Police te chuan he thil hi rang taka chhui chhuakin Rodinliana(37) s/o T.Ngursiama, Apuia Tochhawng tia hriat lar, Khawzawl Hermon Veng, tuna Chanmari West, Aizawla cheng mek chu man a ni a. A mobile phone pahnih leh SIM Card te pawh mansak nghal niin, “Thingtlang Pa” tih account hi kumin kumtira a siam ngei a nih thu leh, ni 11.3.2022 hian Chief Minister leh mi thenkhatte vauna thu hi a post ngei thu a inpuang tawh a ni. Rodinliana hi Aizawl PS Case No. 178/2018 Dt. 1.9.2018 u/s 506/505(2)-ah kha tih laia Chief Minister ni mek vauna thu a post avangin man a lo ni tawh a ni.

Ngun taka Rodinliana social media account-te check a nih hnuin facebook account pakhat “CC Azyu” nen helna chungchang thil, ralthuam, sum leh training neih dan tur te thlengin an rel dun thin tih hriatchhuah a ni a. Er. H.Lalzirliana, MLA, Mamit Constituency chungchang “ZORAM POLITICS GROUP1”-a post-ah MLA hi thah tur list ah a tel thu te he ‘CC Azyu’ account atang hian comment a ni bawk.

“CC Azyu” inti pawh hi chhui chian nghal niin, Chanchinmawia(44) s/o Lalawia(L), CC-a tia hriat, Zohnuai, Lunglei-a mi a ni tih hriatchhuah a ni a, Lunglei Police ten ni 13.3.2022 zan dar 11:45 p.m. khan Serkawnah an man nghal a ni.

Mizoram Police chuan he thilah hian midang inhnamhnawih an awm a nih pawhin a chhui chhunzawm zel dawn a, hetianga social media kaltlanga midang phiarruk leh rikrap ching lo turin mipuite a ngen a ni. A tha lo zawnga social media hmangte hi Mizoram Police chuan a en liam mai mai dawn lova, chhui chhuaha, dan anga hrem zel an ni ang.