No.1907/2020-2021
June ni 10, 2020 khan Mizoram Police chuan hetiang hian thuchhuah a siam
1. Dt.1.6.2020 zanah khan Aizawl Ramhlun Venglaia Home Quarantine-a awm mek, mipa kum 22 mi chuan a thiante pathum, Aizawl Ramhlun North-a cheng, mipa kum 23, mipa kum 25 Aizawl Ramhlun Vengthar-a cheng leh Aizawl Ramhlun Venglai-a cheng mipa kum 24 mite chu a ATM card pein pawisa a lak chhuahtir hnuah zu lei turin a lo tir tih thu dawn a ni a. Zu pawh hi Home Quarantine-a awm mek hnenah hian a thiante pathum hian an pe nia hriat a ni bawk. ATM card petu, Home Quarantine-a awm mek hi RT-PCR a test a nih hnuah Covid-19 hri vei nia hriat a nih avangin a thiante pathum pawh hi RT-PCR test tir an ni a. Amaherawhchu tun dinhmunah chuan anni pathum (3) te RT-PCR result hi a negative rih a ni.
He mi chungchangah hian investigation uluk taka neih mek a ni. Mihring nunna atana hlauhawm natna thehdarh theih kawngah fimkhur lo taka an thiltih avangin leh midang nunna derthawnga awm theia an siam avangin heng mi palite lakah hian Bawngkawn Police Station Case No. 161/2020, Dt. 9.6.2020 u/s Sec 269/336 IPC r/w 5(9) of The Mizoram (Containment and Prevention of Covid-19) Ordinance, 2020 hmangin thubuai siam a ni a. Thubuai siamsak mekte hi Quarantine mek leh ZMC lama awm mek an nih avangin man an la ni rih lo a. Hun remchang hmasaah man a, an chungah dan anga hma lak zel a ni ang.
2. Dt. 6.6.2020 ah khan Khatla East Community Quarantine Centre-a awm mek pakhat chu pawn lam atangin mi pakhatin damdawi ruih theih pek ruk a tum tih report dawn a ni a. Aizawl Police Station-in hma lain he thuah hian mipa kum 33 mi, Khatla South-a cheng mek chu Police station-ah hruai niin thil thlen dan chhui nghal a ni a. Khatla East Community Quarantine Centre-a awm mek mipa pakhat chu damdawi ruih theih pek ruk a tum ngei nia hriat a ni.
Hemi chungchangah hian investigation uluk taka neih mek a ni a. Mihring nunna atana hlauhawm natna thehdarh theihna kawngah fimkhur lo taka thil a tih avangin leh a thiltih avanga midang nunna derthawnga awm theia a siam avangin mipa kum 33 mi, Khatla South-a cheng mek lakah Aizawl Police Station Case No. 231/2020 Dt. 9.6.2020 u/s 269/336 IPC leh u/s 5(9) The Mizoram (Containment and Prevention of Covid-19) Ordinance 2020 hmangin thubuai siam a ni. Thil tisualtu hi RT-PCR test neih tir a ni a. A result a negative hnuah Quarantine Facility-a dah a nih avangin man nghal a ni lo a. Quarantine Facility-a a awm hun chhung a zawh hunah mana thu zawhfiah a ni ang a, dan angin a tul ang zelin hma lak a ni ang.
Covid-19 darh zel tur venna kawngah mitinin tih tur kan nei theuh a ni tih hre nawn leh ila, sawrkarin dan leh inkaihhruaina a siamte tha taka zawm theuh hi kan mawhphurhna a ni.
